香港人一向都好肯洗錢食靚海鮮，唔少人都對生蠔情有獨鍾添！北角最近新開咗間意式蠔酒吧，除咗主打生蠔外仲有海鮮食。負責人Calvin有多年管理餐廳嘅經驗，因為太鍾意食蠔同海鮮，所以希望可以將最高水準嘅海鮮同生蠔帶畀食客。

餐廳所有嘅海鮮都係親自同相熟嘅供應商拎貨，質素有一定嘅保證架。而且店內有自己魚缸飼養所有新鮮海鮮同埋蠔，好似生蠔咁，有客人叫先即刻開殼，真係鮮上加鮮啊！

海鮮拼盤($888)

嗱，呢個海鮮拼盤真係抵食之選。一個拼盤內有四隻生蠔、一隻麵包蟹、北歐龍蝦仔、大蜆、青口、螺同蝦，兩個人食都幾Full吓。特別要介紹吓呢隻麵包蟹，餐廳用上新鮮遊水麵包蟹，客人落單先會撈起再烹調同冷凍，所以製作需時約 30 分鐘。麵包蟹嫩滑鮮甜，蟹膏係香濃嘅。另外北歐龍蝦仔同大蜆都一樣咁甜，食完真係忍唔住講句oishi～

生蠔拼盤(根據款式逐隻計，約$56-78/隻)

餐廳每日都會有八款或以上嘅生蠔供應，Calvin話佢哋偏向選擇鮮甜爽口、重海水味同埋甜鹹味適中嘅蠔。好似而家就係法國蠔當造，海水味重有GREY’S SPECIAL、輕微Creamy可以試GILLAR DEAU，BLACK PEARL呢款就鹹少少。但因為時令關係，下個月開始就會轉入澳洲蠔啦～

火焰烤焗春雞($198)

雖然餐廳主打蠔同海鮮，但其他餐點水準一樣咁高。想睇Fire show呢味菜滿足到你，春雞表面倒上濃郁嘅橙酒，上菜時會燃點火焰令春雞更加皮脆香口。而且雞肉充滿肉汁，好嫩滑。

墨汁海鮮細麵條($168)

墨汁意粉而家都幾常見，但呢度係特意購入一款成本價三百幾蚊嘅墨魚汁去煮，Calvin話一樽汁仔夠整六個意粉架咋。意粉Creamy惹味，帶少少辣，而且意粉軟硬度適中。

意式細扁麵配西班牙大紅蝦($398)

因為西班牙大紅蝦嘅蝦膏本身味道太濃郁，單食就有啲heavy，所以就先將蝦頭煎香，再拎啲膏去撈意粉，每一條意粉都吸收咗紅蝦味道，啖啖都係蝦膏味！

So, Oyster &Wine Restaurant

地址: 北角第二十一威菲路酒店地舖威非路道21號

文: Yanica

相、片: Tom Li