秋日甜蜜 10-11月下午茶圖鑒

秋風起，唔單止可以食大閘蟹，更係約閨蜜一齊食Afternoon Tea嘅好時機！今次開飯仔就幫大家精選其中六款下午茶套餐，唔少更係同護膚品牌聯乘，可以享受秋日午後甜蜜時光，同時有禮品收啊。

旺角呢間酒店餐廳同法國有機護膚品牌Melvita合作，以玫瑰為主題設計出今次嘅花漾之秋下午茶，當中會有玫瑰造型嘅玫瑰野草莓慕絲配杏仁脆餅，可愛心形嘅玫瑰荔枝紅桑子杏仁蛋糕等。其他茶點亦加入花嘅元素，包括清酒蒸鮑魚韃靼配紫蘇葉及洛神花、接骨木花檸檬芝士蛋糕。每位客人更可獲得Melvita精美禮品一份。

供應時間：即日起至2022年10月30日，下午3:00至5:30
價錢：$598/兩位

Chantecaille限定聯乘下午茶 The Lounge

呢間位於金鐘嘅酒店餐廳就同法國奢華護膚及彩妝品牌Chantecaille合作，品牌最新彩妝系列同黑豹及美洲獅相關，因此下午茶當中會見到貓爪造型嘅黑芝麻瑪德蓮，西柚白芝士蛋糕更印上黑豹同美洲獅圖案。其他精選茶點包括栗子伊予柑、櫻桃朱古力、龍蝦沙律配芒果醬、虎蝦春卷等。每位客人更可獲得Chantecaille皇牌禮品套裝一份。

供應時間：即日起至2022年11月30日，下午3:30至5:30
價錢：星期一至五$318/位，$598/兩位；星期六、日及公眾假期$358/位，$648/兩位

水漾滋味泰式下午茶 Mango Tree Kitchen

秋天天氣特別乾爽，呢間喺太古同元朗都有分店嘅泰國菜餐廳就同瑞士護膚品牌GLYCEL聯乘推出水漾滋味泰式下午茶。以藤籃奉上牛油果柚子沙律、炭燒雞全翼、牛柳串燒、炸魚餅漢堡等鹹點，同泰茶及泰啡奶凍、斑蘭千層糕、椰汁西米糕等甜品，更有迷你海鮮黃咖喱撈麵作為主食！每份下午茶更奉送GLYCEL活膚潤肌體驗裝連禮券。

供應時間：即日起至另行通知為止，下午2:30至5:00
價錢：$288/兩位

新增手工朱古力餐車 SAVVY

朱古力控注意啦！尖沙咀呢間酒店餐廳推出全新下午茶，一大亮點就係「SAVVY's Chocolley」餐車，上面係由糕點總廚自家炮製、唔同口味嘅手工朱古力，客人可以從中挑選六款試食，鍾意嘅話更可以即場買走啊。而精緻嘅三層架就放滿蟹肉紅椰菜三文治、鴨肝慕絲配山羊芝士、雲呢拿野莓泡芺、經典法式蛋白杏仁餅等茶點。

供應時間：即日起至另行通知為止，星期一至五下午3:00至6:00，星期六、日及公眾假期下午3:30至6:00
價錢：星期一至五$478/兩位，星期六、日及公眾假期$498/兩位

奢華下午茶套餐 HUSO

中環呢間以香檳及魚子醬為主題嘅地中海餐廳新推奢華下午茶套餐，以法國地中海沿岸餐廳為靈感，設計出西班牙凍湯、三文魚抹醬佐麵包、手切牛肉他他等鹹點。甜品更有驚喜，魚子醬牛奶雪糕佐香檳啫喱、法式馬卡龍、芝士蛋糕等都非常精緻。想更奢華嘅話，可以加$388加購兩杯Laurent-Perrier La Cuvée NV香檳及10克法國魚子醬。

供應時間：即日起至另行通知為止，下午2:30至5:00
價錢：$528/兩位

Joie-de-Vivre下午茶 Bifteck

為咗慶祝開業一週年，灣仔呢間精緻法日扒房推出期間限定嘅Joie-de-Vivre下午茶，當中包括七款鹹點同三款甜品，最啱帶埋唔太鍾意食甜品嘅伴侶或者家人一齊嘆！下午茶以木盒送上Bite Size嘅法日風格茶點，包括迷你和牛夾餅、甜蝦及三文魚子配日本豆腐奶凍、日本蟹肉可樂餅、芝士櫻花蝦鬆餅、柑橘清酒沙冰。

供應時間：即日起至2022年12月31日逢星期六丶星期日及公眾假期，下午3:30至5:30
價錢：$398/兩位

文: Cathy.H