窩心情人節蛋糕浪漫心形/香醇朱古力/清新果香

情人節進入倒數階段，想同另一半慶祝，一個好睇又好味嘅蛋糕絕對可以令呢個佳節更甜蜜圓滿！今年唔少情人節主題蛋糕都以經典嘅朱古力或清爽嘅水果口味為主，而且造型精緻，情人節打卡絕對必備。

  ►GODIVA：士多啤梨覆盤子朱古力蛋糕
  ►A-1 Bakery：GODIVA 浪漫絮語
  ►Arte by Padaria：番石榴草莓慕絲蛋糕
  ►LIFETASTIC：日本草莓蛋糕、心形招牌草莓西瓜蛋糕
  ►Nina Patisserie：心形士多啤梨拿破崙、紅絲絨蛋糕
  ►The Cakery：浪漫甜心純素蛋糕、士多啤梨玫瑰千層酥
  ►雪月花：Rose of Venus、Darling & Heartbeat
  ►Häagen-Dazs：甜蜜戀熊、兩情相悅

士多啤梨覆盤子朱古力蛋糕 GODIVA

呢間朱古力名店今年推出嘅係以70%黑朱古力慕斯、士多啤梨忌廉、覆盤子醬、海綿蛋糕組成，外面再裹上一層白朱古力慕斯同一圈士多啤梨脆餅嘅士多啤梨覆盤子朱古力蛋糕。粉紅色愛心造型加上銀箔特別IG-able，食落朱古力香同果香並重，唔會太膩。

GODIVA 浪漫絮語 A-1 Bakery

而嚟自日本嘅連鎖餅店今年再度同GODIVA聯乘，推出士多啤梨生朱古力慕斯蛋糕，頂層係GODIVA朱古力忌廉圍住日本甜王士多啤梨啫喱，下面係一層層朱古力慕斯、士多啤梨果醬、生朱古力同朱古力海綿蛋糕。整體朱古力味道比較突出，甜香交織。

番石榴草莓慕絲蛋糕 Arte by Padaria

想重溫酸酸甜甜嘅戀愛滋味，呢間精品蛋糕店情人節限定嘅番石榴草莓慕絲蛋糕似乎就好啱喇。以番石榴慕絲、士多啤梨酪、杏仁海綿蛋糕、薄脆組成紅色愛心，味道酸甜。而柔滑嘅慕斯同香脆嘅薄脆對比分明，口感豐富。

日本草莓蛋糕、心形招牌草莓西瓜蛋糕 LIFETASTIC

同樣係水果，呢間餐廳就推出以日本佐賀莓小姐為主題嘅日本草莓蛋糕，頂層係原粒佐賀莓小姐士多啤梨，配搭海綿蛋糕、士多啤梨同煉奶忌廉，士多啤梨嘅酸味同煉奶嘅甜味非常夾。而餐廳嘅招牌草莓西瓜蛋糕亦推出情人節限定嘅愛心版本唷。

心形士多啤梨拿破崙、紅絲絨蛋糕 Nina Patisserie

呢間酒店集團嘅精品餅店就推出兩款二月限定嘅心形蛋糕，一款係心形嘅士多啤梨拿破崙，一層層鬆脆酥皮、士多啤梨同吉士醬，絕對會令愛食士多啤梨嘅另一半心動！另一款係鮮紅色嘅紅絲絨蛋糕，非常搶鏡，口感軟滑。

浪漫甜心純素蛋糕、士多啤梨玫瑰千層酥 The Cakery

食蛋糕都可以少啲罪惡感嘅，呢間本土烘焙店主打採用健康食材，同以天然糖份代替精製糖。好似浪漫甜心純素蛋糕就用純素雲呢拿海綿蛋糕加上清甜嘅士多啤梨醬，酸甜可口。而純素士多啤梨玫瑰千層酥更加上代表浪漫嘅玫瑰，更有情人節氣氛。

Rose of Venus、Darling & Heartbeat 雪月花

AK@MIRROR同哥哥一齊開嘅日式甜品店都推出一系列情人節限定嘅甜品！Rose of Venus係無麵粉朱古力軟心蛋糕配紅莓玫瑰花，無麵粉所以有麩質敏感都食得呀。Rose of Venus需要三日前預訂，訂唔切亦可以點Darling & Heartbeat，即係士多啤梨吉士撻同麻糬軟心紫薯撻，兩款蛋糕一雙一對唔可以單獨購買唷。