唔講唔覺，月尾又有假放喇，係端午節呀！即係話又有糭食喇~ 今年有幾款走在潮流啄啄嘅新糭出現咗，芝士、紫薯、黑松露甚至鰻魚都成為糭嘅材料之一，另外仲有幾款行健康路線嘅素糭添。

超羣 四重芝士豚肉糭

近年飲食界講得最多嘅一定係芝士同紫薯，而超羣就將佢哋變成糭嘅材料之一。四重芝士豚肉糭講緊嘅四重，係車打芝士、美國芝士、瑞士芝士仲有日本拉絲芝士，芝士控必試啦。而紫薯金薯糭用上嘅係沖繩直送紫薯蓉同日本黃蕃薯粒，香得嚟應該會幾飽。

帝都酒店 原隻鮑魚黑松露糭

聽個名就知呢隻糭來頭唔小，原隻南非十頭鮑又彈牙又有嚼勁，先以唐排、老雞等秘方扣煮，吸晒上湯精華之後再混入意大利黑松露醬，所以好香下。

帝京酒店 櫻海老黑豚鰻魚糭

呢隻糭，外層嘅糯米加入咗味噌、味醂、同櫻花蝦，而中間嘅餡就係鰻魚同黑豚腩肉，成件事都好和風，鰻魚飯就食得多，鰻魚糭就真係要試下。

鴻福堂 紫薯桂花粒粒紅豆梘水糭

呢隻糭都係由紫薯做主角，不過就加埋清新啲嘅桂花一齊，感覺冇咁滯，中和返下。而糯米就混入埋紅豆，甜甜地咁，唔錯啊。

奇華餅家 姬松茸藜麥姬素糭

素食嘅朋友，呢款「姬松茸藜麥素糭」口感煙韌，味道清甜，帶有杏香，裡面嘅餡仲有粟子同木耳，係幾有營養，姬松茸有助活化免疫系統，紅藜麥又有蛋白質、鐵質同纖維。

翠亨邨 柑桔鹼水糭

佢哋出咗兩款素糭，分別係姬松茸紅米素糭同柑桔鹼水糭。前者配埋豆類、栗子、紅菜頭等等，而後者就係以鮮製柑桔茸製成，再蘸上蜜味柑桔醬咁食，散發出淡淡嘅果香。

海景軒   紅豆金栗糭

同樣都有出素糭嘅海景軒，係紅豆金栗口味，夾埋一齊甜而不膩，咬落軟糯得嚟又有些少咬嚼。

文：Kar