台式飲品店呢個夏天繼續大熱，銅鑼灣最新有呢間星級過江龍代表，黑人陳建州、周杰倫、小S、余文樂都飲過，為咗慶祝新店開幕仲有新嘅萬丹紅豆系列，唔咬珍珠咬粒粒紅豆同樣夠Sweet！
 

春陽茶事繼中環後，最近去到銅鑼灣開分店，仲帶嚟新嘅紅豆系列！採用台灣屏東萬丹紅豆，特色係品質優良、紅潤飽滿。
 

萬丹紅豆烏龍鮮奶（大杯$35，另有中杯$32）

萬丹紅豆配明治牛奶同烏龍茶形成天然漸層，打卡後記得搞勻先飲呀。入口先有烏龍茶清香，紅豆保留一粒粒咬口，但煮得夠腍，舌尖一壓就變成香甜綿密嘅紅豆蓉，甜而不膩。
 

葡萄柚綠茶（大杯$35，另有中杯$32）

夏季限定飲品，用葡萄柚汁、新鮮葡萄柚肉配台灣綠茶，以綠茶清香突出葡萄柚嘅酸甜味道，帶少少澀令成杯飲品更清新，仲夏飲返杯真係即刻醒神返晒。除咗有塊葡萄柚肉影相更好睇之外，飲品上面亦有加幾塊葡萄柚肉，食埋更Refreshing！
 

 

桂花蜜烏龍（大杯$27，另有中杯$24）

招牌飲品檸檬蜜烏龍（中杯$28，大杯$31）飲得多亦可以試下轉下口味，呢杯就用台灣桂花蜜配烏龍茶。入口桂花香氣立刻佔據口腔，而烏龍茶後韻減低花蜜甜度，唔會一味死甜。
 

涼心青草茶（大杯$27，另有中杯$24）

另一杯夏季限定，台灣青草茶又叫百草茶，以多種青草加少少薄荷提味，類似香港人飲涼茶嘅概念，佢地通常都當係夏天嘅嘅保健飲品，有解熱之效。呢杯涼心青草茶飲落有啲似五花茶，甘而唔苦，有少少藥材味。
 

溫馨提示一句，以上夏季限定飲品預計供應至9月，想試嘅朋友記得把握機會啦。常設飲品當中甘蔗鮮奶（中杯$30，大杯$33）同黑糖珍珠鮮奶（中杯$32，大杯$35）亦係人氣之選。
 

春陽茶事
地址：銅鑼灣謝斐道520號渣菲大廈地下A舖

文、相、片：Cathy