下個星期就係端午節，準備好啲糭嚟應節未先？你哋鍾意食鹹肉糭定鹼水糭？咩都好，近年香港人愈嚟愈注重健康，有見及此，今年唔少酒店或者餅店等都選用多款健康食材，推出咗啲行健康路線嘅糭呀。

低糖之選   鴻福堂

一般鹼水糭都帶有甜味，不過呢隻陳皮豆沙蓮子百合鹼水糭講到明係低糖之選，就唔使怕啦。加入埋有養心安神之效嘅蓮子百合，紅豆蓉清甜而陳皮甘香，健康得嚟都唔會話太清淡。

有機三色藜麥  帝京酒店

呢隻桂花藜麥甜豆糭，材料好豐富下啊。有齊五色雲豆，包括紅腰豆、大紅花豆、大白雲豆、黑豆同白奶花豆，仲有有機三色藜麥，有唔少纖維啊，有種豆香之餘亦有陣陣桂花香。

養生穀物素糭  Green Common

Green Common一向大力推行素食文化，佢哋嘅端午糭當然唔例外。一隻「圓滿裹蒸糉」就有成14種珍貴食材喺入面，包括姬松茸、牛肝菌、黑松露醬、雞髀菇、黃耳等等。而「如意藜麥珍珠糉」就用珍珠米取代糯米，再配以養生嘅藜麥、紅米、黑米等多種穀物，絕對係健康首選。

原粒栗子藜麥素糭   奇華餅家

奇華都出素糭，軟綿黏糯嘅小圓糯米混入三色藜麥、原粒栗子、蓮子、紅棗等等健康食材，除咗有蛋白質同纖維，仲係三低，低脂、低鈉、低熱量呀，健康仔。

松茸紅米  翠亨邨

姬松茸有助提昇免疫力、紅米有美容養顏之效、而紅菜頭可以抗氧化，集呢三款健康食材於一身嘅全素口味姬松茸紅米素糭，清香得嚟亦有栗香，口感豐富。

抗衰老黑蒜  紫粵軒

佢哋隻五彩黑蒜東坡肉糭，有好多種含豐富膳食纖維嘅豆類呀，好似綠豆、紅豆、眉豆、紅腰豆、青豆咁，而且仲有近年好興食，有抗氧化又抗衰老之效嘅黑蒜，健康得嚟有少少重口味呀科科。

文：Kar