終於等到你開喇！去親日本都要去涉谷排隊食、CP值特高嘅梅丘壽司美登利總本店，於香港旺角開設首間海外分店，而且係直營店，有來自日本嘅師傅坐鎮，確保質素同日本一樣！梅丘壽司美登利總本店開業40年，起源於東京，於日本有11間分店。
開業初期有兩位日本師傅監場，包括日本店的採購總監，而來自名古屋店嘅望月美男師傅，將會長駐香港店，佢已經喺美登利工作11年，年資深，而3位香港師傳亦專誠飛往日本受訓兩個月，將美登利嘅精髓都帶到香港。
食材同日本店供應商一樣，而且只係獨家供應俾美登利，本地其他日本食店唔會食得到。大部份食材都係經過日本店作QC先至來港，每日由豐州空運直送。除咗三文魚係來自挪威、加拿大海膽之外，基本上9成都係日本貨。
壽司米、醋同埋紫菜都同本店一樣，選用山形米同瀨戶內海海苔製作，所有壽司即叫即握。款式同日本店大致一樣，少咗部份貝類、蔬菜類等。而大家最關心嘅價錢，特選手握壽司盛合賣$275，日本就只賣2,000円，極上大拖羅日本賣500円，香港就賣$48。睇落貴過日本，但其實壽司最平由$10起，份量亦足，日本名牌算合理啦。
必吃有吞拿魚三貫，由獨家供應商來貨，有齊赤身、中拖羅同大拖羅，魚生長過壽司飯，大拖羅睇得出油脂紋理，入口魚味濃郁，魚油甘香。蟹三貫（$88）就有生熟松葉蟹同埋迷你蟹肉蟹膏壽司。
大赤海老壽司（$25）同特盛筋子（$60）都大大份，海老質感軟糯黏口，筋子份量澎湃，可用紫菜包住成件壽司來食，食完都幾飽！
元祖原條穴子壽司（$78）足有7、8吋長，穴子配上香甜醬汁，口感比鰻魚腍但更鮮甜，兩個人都未必食得晒！
海膽壽司有兩種，極上海膽（＄78）來自日本，味道更甘甜，而普通海膽軍艦係加拿大貨，識食梗係食日本貨啦。
另一個必吃係特級玉子壽司（$35），足足兩吋厚，再放壽司飯喺面，賣相好浮誇！玉子係日本製造再運來港，味道偏甜，鍾意食蛋不妨點來食，不過食得晒先至好嗌！
坊間好少有嘅吞拿魚筋（$10），炙燒放上軍艦上，魚味濃郁而且充滿甘香魚油，鍾意食吞拿魚要試試。
店子招牌蟹肉蟹膏沙律（＄85）都係必點，松葉蟹肉多到成座山咁，加上鹹香蟹膏，係抵食嘅！而茶碗蒸（$25）入面有蝦同帶子，蛋好滑溜，有木魚湯同海鮮香味。
壽司豉油都係自家品牌，唔算好鹹。仲可以柯打自家美登利出品日本酒（$108/支），味道清爽，送壽司唔錯。
美登利將於11月2日試業，21日正式開業，現時不接受訂座同外賣，大家都係乖乖哋排隊啦。
地址：旺角彌敦道639號雅蘭中心2樓202號舖
文：Perrins
相、片：Tom Li