一到放假就想睡到三點再嘆個早午餐？中環呢間新開Cafe就主打澳洲風格Brunch，色彩繽紛而且用上多款新鮮食材，賣相吸引食落又夠滿足！裝修以大地色為主，有唔少打卡點，加上係寵物友善，同朋友帶埋毛孩一齊去就最啱。
 

Cosha位於中環伊利近街，其中一位店主曾於澳洲居住，今次喺Soho區開店就決定主打澳洲風格Brunch，其中一個特色係採用新鮮食材，所以餐廳用嘅牛油果同水果都由店主每日親自到果欄採購。
 

UFO（$128）

酸種麵包加上火箭菜、自家醃製蕃茄、可達芝士、煙肉、牛油果同蛋黃，因為外形似UFO就取名UFO喇。自家醃製蕃茄味道酸甜，可達芝士同樣係奶香中帶微酸，加埋火箭菜可以平衡返煙肉嘅油膩感。
 

牛油果熟度啱啱好，口感Creamy。而蛋黃係日本可生食用雞蛋，篤穿嚟食可以增加濕潤度。整體味道層次豐富同時又唔會太膩。
 

Summer Vibe（$75）

一睇個名就知好啱夏天食！其實係用時令水果配搭希臘乳酪同燕麥片（Muesli），水果全部即點即切，雖然因此需要等約20分鐘，但換嚟嘅係最新鮮嘅酸甜多汁滋味。希臘乳酪比一般乳酪更濃稠厚滑，配搭帶淡淡穀物香燕麥片口感豐富。
 

碟邊仲有一小碟蜜糖，可以按自己口味添加。建議大家一開始可以唔加，先品嘗各款食材嘅原味，中間再加換個口味。
 

 

Croissant French（$98）

菜式名源自主角Croffle係用牛角包加上法蘭西多士嘅製作方法，即係將法式牛角包加上西多用嘅蛋汁，再用窩夫機壓成一格格嘅Croffle狀，咁樣可以保留牛角包嘅層層酥脆口感同牛油香，同時添加一層好似西多咁嘅香脆感！加上自家製藍莓糖漬同可達芝士，甜而不膩。
 

Wakey Caramel（$58）

店主留意到香港好多Cafe嘅Smoothie都係用糖漿加冰打成，佢哋就參考澳洲餐廳做法，將香蕉等水果雪藏，打嘅時候唔使加一粒冰都做到冰凍效果！口感厚滑而且相當飽肚。呢杯Wakey Caramel就用香蕉、乳酪、焦糖、紅棗配搭咖啡，飲落會焦糖嘅苦甜香、香蕉甜味同咖啡嘅香醇交織，不時又會咬到紅棗肉添加甜味，有驚喜。
 

Latte（$42/Hot，$45/Iced）

Cafe嘅咖啡選用本地烘焙商roastwork出品，主要用Nutty風味嘅拼配豆，另有一款偏Fruity風味嘅單品豆就係Ice Americano專用（或者如果你鍾意Fruity風味亦可以問咖啡師可唔可以轉豆㗎）。呢杯Latte就用咗嚟自四個產地嘅拼配豆，中深焙入口有濃郁朱古力香，甜度較高，後韻帶焦糖苦甜香，同餐廳大部分Brunch都好夾。
 

Cosha
地址：中環伊利近街61號地舖

文、相：Cathy.H