無論幾多歲都好，見到色彩繽紛又夠甜美嘅糖果心情就自然變好。最近各位「甜心」又有多間目標，就係呢間傳統英式糖果店嘅旺角分店！保留古典風格裝修，入面嘅糖果同朱古力選擇眾多，置身糖果屋之中，開飯仔幫大家揀咗三大值得一試嘅種類！
 

Mr Simms Olde Sweet Shoppe繼中環同灣仔之後，最近過埋海嚟到旺角開新第三間糖果店，占地唔算大但種類應有盡有，由英式傳統至潮流新式，從綜合禮盒到自選糖果，呢度都總有代表。
 

第一必買嘅係呢度嘅Chocolate Bar，一嚟因為花款特別多，二嚟細Size嘅Chocolate Bar係旺角分店獨有！最啱鐘意試唔同口味嘅朋友仔自私食多幾款。
 

第二必買嘅係佢地嘅特別版Jelly Belly，例如呢盒Harry Potter，如果有睇過相關小說同電影嘅應該唔會覺得陌生，入面有草青味、番梘味甚至係嘔吐物味！未試過嘅Fans可以入手啦。
 

覺得細細盒唔夠分？不如買呢盒Bean Boozled，樽蓋特別設計過，每次會隨機抽出一粒Jelly Beans，最好玩嘅地方係同一隻色有正常同奇怪兩款口味，好似白色可以係正常嘅椰子味，亦有可能係BB尿片味！開Party玩最開心。
 

第三必買嘅就係而家買少見少嘅各款懷舊糖果，好似細細個唔少女仔都食過嘅唇膏糖，呢度就有異曲同工嘅唇彩糖同Whistles。另外仲有唔同種類嘅爆炸糖！
 

另外仲有唔少搞笑選擇，例如獎牌朱古力同大大塊寫上特別字句嘅波板糖，送畀朋友做禮物就最啱喇。

文、相：Cathy