小丸子Fans注意！櫻桃小丸子同佢嘅好朋友屋企人一起嚟到呢間台式休閒餐廳啦！以小丸子探險記為背景，三間分店各自都有唔同裝修主題同限定美食，另外亦有四款角色特飲同一系列精品，去勻哂先集齊郵啊。
分店主題美食
小丸子番茄肉燥鰻魚飯（九龍灣店限定）（$128）
茶木‧台式休閒餐廳三間指定分店即日起供應櫻桃小丸子主題美食，每間分店都有一款限定主菜同限定甜品。好似九龍灣店限定主菜就係嘅番茄肉燥鰻魚飯，四邊係番茄肉燥醬汁加上日式蒲燒鰻魚，再用食用花點綴。
中間就係用小丸子糖紙裝飾嘅白飯。造型可愛之餘，酸酸甜甜又有肉燥香嘅醬汁亦相當開胃，無論大朋友定小朋友都會鍾意。
小丸子吐司禮物盒（九龍灣店限定）（$82）
點少得招牌甜品蜜糖吐司嘅蹤影呢？每日新鮮製造嘅吐司變成吐司盒，裡面係烤至香脆金黃嘅磚塊、藍莓同曲奇雪糕、原粒櫻桃同士多啤梨，色彩繽紛。上面再加小丸子精靈造型嘅手工棉花糖，打卡一流。
小玉南瓜海鮮魔法（銅鑼灣世貿店限定）（$138）
小丸子嘅好朋友小玉出場啦！配合有海景睇嘅銅鑼灣世貿店，呢度嘅主題美食亦以海洋為主題，原個迷你南瓜當中加入新鮮加拿大龍蝦尾、智利藍青口、鱸魚等，旁邊亦有炸花枝丸、小丸子等角色造型嘅蘿蔔等裝飾，相當豐富。
小丸子熱香餅（銅鑼灣世貿店限定）（$68）
甜品係印上小丸子大頭嘅熱香餅！海灘嘅賣相嚟自天藍色奶蓋醬同餅乾碎嚟扮海同沙灘，令人眼前一亮。再加士多啤梨、香蕉、奇異果粒粒、胚芽忌廉，味道同口感層次都相當豐富。
花輪皇子元貝炸蝦飯（旺角瓊華店限定）（$88）
相當香口嘅一款主菜，花輪皇子造型白飯當然係重點，另一焦點就係燒大啡菇上面嘅日本刺身級焗元貝！伴金黃色嘅吉列蝦、香滑芝士醬，同日本心裡美（蘿蔔）配菜。
小丸子綠茶心太軟（旺角瓊華店限定）（$68）
綠茶心太軟用上三款日本同台灣產嘅綠茶粉調製，即叫即焗，確保一切開就有誘人嘅流心效果！再加上香脆鬆化又香甜嘅芒果拿破崙，雙重甜蜜衝擊。加上上面有小丸子精靈同花輪皇子，同另一半分享夠哂Sweet。
更多【飲食潮流】： |
全線分店供應主題美食
Bili bala小食拼盤（$78）
小丸子牛肉麵（$80）
小丸子探險芋圓（$55）
爺爺櫻桃湯（$36）
（左至右）小丸子櫻桃西瓜柳丁汁、花輪玫瑰咖啡拿鐵、爺爺抹茶歐蕾、野口竹炭仙草奶茶（$38）
小丸子旋轉魔法曲奇（$168）
小丸子杏仁脆條（$43）
小丸子鳳梨酥（$63）
【小丸子一家親食大餐】九龍灣MagaBox店
地址：九龍灣宏照道38號MegaBox地下4-6號舖
（照片由餐廳提供）
【小丸子海洋友聚時光】銅鑼灣世貿中心店
地址：銅鑼灣告士打道280號世貿中心P2樓P211B號舖
（照片由餐廳提供）
【小丸子櫻の時刻】旺角瓊華中心店
地址：旺角彌敦道628號瓊華中心10樓全層
文、相、片：Cathy