荃灣近幾年真係越嚟越多特色餐廳，呢間年初新開張嘅Cafe亦係其中一個例子。佔地唔大又唔算喺正市中心，但唔少人特別造訪，就係為咗賣相同味道都有驚喜嘅分子甜品。其中一款要連埋蕉皮食，另一款嘅蛋殼一樣食得落肚！
 

位於荃灣昌寧商場嘅留白唔容易搵，一方面商場人流唔算好旺，二嚟小店相當低調無掛招牌。反而有種低調之中，同店名呼應嘅感覺。Cafe供應沙律、Bagels、意粉、All Day Breakfast、甜品同各款飲品，當中以甜品最有特色，因為融合咗分子料理，賣相同一般甜品完全唔同。
 

蕉（$55）

成條蕉咁上枱，仔細睇先發現半條焦糖香蕉後面係朱古力脆皮包住雲呢嗱雪糕！而且脆皮由甜品師人手畫上去，每條嘅花紋都係獨一無二。碟邊有朱古力班戟同64%朱古力樹枝裝飾，朱古力選用法國Valrhona品牌，甜味自然。同香蕉唔單止係最佳拍檔，口感對比亦非常分明。
 

蛋（$65）

蛋嘅造型更花心思，蛋殼其實係白朱古力，裡面嘅蛋液係用咗果膠同芒果汁。值得留意嘅係一拮落去，芒果汁就會緩緩流出，流心程度同真雞蛋有得揮！而雲呢嗱雪糕上面有一層泡泡，食落帶少少酒香帶起味道層次，但原來係用咗一種無酒精成分嘅麝香葡萄甜酒。同樣配以朱古力班戟。
 

石（$55）

最新推出嘅甜品，外層係白朱古力，裡面係白朱古力雲呢嗱慕斯，再加一層熱情果醬。熱情果嘅獨特酸甜果香同白朱古力嘅甜味道平衡，酸味比上面兩款甜品突出，更有清新嘅感覺。
 

伯爵蘋果Bagels（$45）

輕食方面亦見心思，Bagels上面嘅係自家製嘅伯爵茶口味嘅忌廉芝士，用紅茶香減低芝士嘅膩度。而青蘋果片加糖再燒出焦糖脆面，一咬落去焦糖嘅甜同香脆，同青蘋果嘅微酸同多汁形成對比，整體味道清新。而Bagels口感煙韌唔會過硬，適合大部分香港人嘅口味。
 

班尼迪（$78）

呢份班尼迪蛋非常豐富，酸種麵包上面係煙肉、水波蛋同荷蘭醬汁，再伴以三文魚同藜麥沙律。自家調製嘅荷蘭醬汁Creamy帶香，加埋流心嘅水波蛋同煎香咗嘅煙肉，超有療癒感！而藜麥沙律唔單止口感豐富，黑醋汁嘅酸有解膩作用，就算一個人食哂成碟罪惡感都少啲。
 

粉Pink（$45）

飲品選擇從咖啡到茶都應有盡有，當中最特別嘅係四款以顏色命名嘅特飲，都加入無酒精成分嘅酒。好似呢杯粉紅色加上泡泡非常搶眼嘅粉，就係用咗無酒精粉紅酒，飲落有Cocktail嘅感覺，但就唔洗驚飲醉，幾過癮！
 

由賣相、用料到味道，都感受得到店主嘅用心，而且店主亦鍾意挑戰新事物，之後唔排除會有更多創意甜品同輕食面世！想打卡呃Like兼畀自己一個小驚喜，不妨嚟呢度試下。
 

留白
荃灣西樓角路202-216號荃昌中心昌寧商場地下12號舖

文、相、片：Cathy