文青打卡最新嘅聖地之一——南豐紗廠，開幕以嚟陸陸續續有各式各樣嘅餐廳進駐，好似之前同大家介紹過嘅4間特色café、健康素食餐廳同老字號甜品等，最新開業嘅就有新界西朋友期待已久嘅Taproom呀，仲要係旺角人氣Taproom嘅分店！啤迷注意！啡迷都可以注意，有咖啡飲的啊。

去過旺角店嘅beergeeks都會知道，佢哋嘅小食，好似炸雞翼配腐乳醬呀、炸薯條呀同各式三文治都係佐酒神物，之但係就未必人人可以當正餐咁食……但要喺荃灣新店食正餐加飲酒一場過完全冇問題，事關增添嘅6款當店限定新菜式，都係以飽肚類嘅飯麵為主呀。

首推好似沾麵嘅海鮮沾意，師傅以日式高湯木魚花湯做基底，加入周打湯同麵豉製成沾意湯汁，亦有心思地將烘乾咗嘅乾瑤柱碎撒入意粉中，鹹鮮味突出。

至於芝士控嘅首選就一定係羊奶杏鮑飯，食落就知道真功夫！用上羊奶芝士同巴馬臣兩款芝士製作㗎，你話芝士味香唔香濃嘞？羊奶味又夠羶香喎，啖啖都好香口，如果怕太膩嘅話建議可選配果香味較重嘅手工啤酒或cider啊。

另一款意大利飯同樣充滿特色，係坊間少見嘅組合——馬來肉骨飯。之係馬來西亞肉骨茶味嘅意大利飯啊，每啖飯都係甜甜地，又同時滲出輕輕der藥材味，仲有絲絲豬肉絲摻雜住喺中間，連埋香脆嘅煙肉一齊食，係幾有風味嘅。

麵豉金寶意同心內美牛肉意粉嘅感覺就相對較light少少，前者融入美國南部雜湯嘅意念，連埋蕃茄、青椒、秋葵等配菜，未食已經先聞到鹹鹹香香嘅燒麵豉味，食落仲有啲喺後勁先爆發出嚟嘅辣味； 後者「心內美」其實係種味道清甜嘅紫紅色蘿蔔，加埋牛肉、蒜頭、冬菜一齊炒意粉，又幾入味，啲意粉仲好彈牙添。

餐廳一向主打嘅三文治/麵包都設計咗新款，包住喺硬身少少嘅法包入面嘅，係軟腍又入味嘅手撕南乳炆豬肉，淋埋熱溶車打芝士醬、放返幾粒醃漬墨西哥辣椒，酸、辣、鹹味集於一身，富層次感。

 (左起) 發花癲、Hunk Sir、Jeng

講咗咁多嘢食，係時候要介紹返啲酒喇。呢度總共有21個tap頭，正式開業後，將會按時令精選各款本地同外國嘅手工啤酒畀各位啤迷嘆返夠本。暫時on tap 嘅有少爺、hEROES同The Brew Commons嘅酒款。少爺Jeng堅係正，係款非常清爽嘅IPA，簡單得嚟又帶有強烈回甘；另一款清新嘅IPA係The Brew Commons嘅發花癲，仲要係single hop IPA，無論聞定飲都好香柑橘味；hEROES嘅Hunk Sir就完全係另一個方向，沉實穩重，微微嘅烘焙香中帶有咖啡氣息。

有別於旺角店嘅係呢間店仲有咖啡飲，啡迷同酒迷可以各取所需啦。餐廳同本地豆房Cotton mutton合作，選取佢哋嚟自印尼、埃塞俄比亞、台灣日月潭等地嘅淺炒豆泡製一杯杯嘅手沖咖啡、氮氣咖啡或者espresso based嘅咖啡飲料，好似呢杯Estonic 咁，就係Espresso 加tonic water嘅成品喇。

不得不提嘅係，餐廳仲有兩部街機，有過百款遊戲，重點係客人可以免費！任打！是咪happy先？

TAP The Ale Project
地址：荃灣白田壩街45號南豐紗廠5廠3樓302號舖
正式開業日期：4月4日

文、相、片：Kar