香港精品咖啡店越開越多，呢個本地品牌最近亦喺上環新開一間兩層高嘅旗艦店，唔單止繼續供應有唔同風味同產地特色嘅咖啡，仲新增咖啡雞尾酒同甜品選擇。保持一貫嘅藍色主調裝修同時，新店地下亦設有露天位置，狗狗主人仲可以免費拎杯Puppychino，等毛孩陪你一齊Chill！
 

Bluebird Coffee旗艦店位於上環干諾道中，同西營盤店一樣固定供應七款唔同產地嘅咖啡豆選擇，都由香港烘焙師挑選並於本地炒豆。而且可以選擇意式咖啡、虹吸、手沖、冰滴、冷泡唔同沖調方法，可以按自己喜好挑選。例如虹吸咖啡會比手沖咖啡Body更厚實、層次更豐富，適合帶堅果風味嘅咖啡豆。
 

手沖咖啡（$42起）

七款咖啡豆當中有四款Regular同三款Premium Beans，開飯仔試嘅呢款係Premium Beans當中嘅Nicaragua豆，用較為低溫嘅手沖方法帶出呢款淺炒豆嘅蜜桃同杏桃甜味同花香。

另一推介係Regular Beans當中嘅Cobalt House Blend，選用Ethiopia日曬同水洗豆，用虹吸就可以帶出更多層次，飲落先有堅果香味，後段微酸，尾韻帶甜。
 

鮮奶咖啡（$38/中，$45/大，$52/特大）

意式咖啡選擇亦非常多，由常見嘅鮮奶咖啡、美式咖啡（$35起），到比較特別嘅花生醬鮮奶咖啡（$42起）、朱古力脆粒咖啡沙冰（$42起）都應有盡有。鮮奶咖啡選用House Blend咖啡豆，口感柔滑，風味清晰。
 

（左）Irish Coffee Whisky（$98），（中）Espresso Martini（$108），（右）Tia Flat White Russian（$88）

夜晚更會提供雞尾酒，如果鍾意酒香咖啡，可以試試呢三款：Irish Coffee Whisky以愛爾蘭威士忌同咖啡調配，Espresso Martini加入濃縮咖啡香氣濃郁，Tia Flat White Russian就奶香更突出口感順滑。
 

朱古力心太軟配雪糕（$98）

旗艦店限定甜品之一，朱古力心太軟外層微脆裡面濕潤有流心，配搭冰涼雲呢拿雪糕同熱嘅招牌濃縮咖啡，冰火交織口感豐富。
 

士多啤梨芒果芝士蛋糕（$98）

以新鮮士多啤梨同芒果嘅自然酸甜襯托出三重慢焗芝士蛋糕嘅嘅濃厚香氣，再加上芒果士多啤梨醬同覆盤子脆脆，整體食落甜而不膩，而且仲好啱配咖啡！
 

抹茶紅豆蛋糕配鮮奶布甸（$98）

賣相精緻，有抹茶紅豆慕斯蛋糕、綠茶雪糕、雲呢拿鮮奶布甸、日本紅豆醬，加上士多啤梨同朱古力布朗尼粒粒點綴，味道同口感層次豐富，又好有和風感。
 

 

牛油果柚子沙律（$68）

輕食選擇亦相當多元化，牛油果柚子沙律主角當然係口感軟滑嘅牛油果同味道酸甜嘅柚子肉，整體相當清爽。
 

培根生菜蕃茄三文治（$35）

飽肚啲亦有三文治選擇，美式經典BLT配搭即係培根、生菜同蕃茄。培根嘅鹹香同爽脆生菜、酸甜多汁嘅蕃茄夾埋層次啱啱好。
 

（前）伯爵茶杏仁蛋糕（$16），（後）花生布朗尼（$26）

糕點類亦有多款口味選擇，伯爵茶杏仁蛋糕茶香清幽，花生布朗尼味道香甜。
 

Puppychino（免費）

地下門外嘅戶外露天位置係寵物友善區，有Paking區域方便各位帶埋狗狗一齊嚟。狗狗主人更可以向員工免費換領一杯Puppychino，即係無糖鮮忌廉，主人嘆咖啡嘅時候狗狗都可以一齊開餐！
 

Bluebird Coffee
地址：上環干諾道中128號豫泰商業大廈地下及閣樓

文、相：Cathy