變變變生命力！雪糕口味18變

唔好以為香港雪糕店都淨係得雲呢嗱朱古力呢啲大路口味，其實唔單止女大先會18變，女孩子夏天最愛嘅雪糕亦有18變！多得創意爆棚嘅各大餐廳老闆同廚師，無論係飲得嘅鴛鴦、啤酒，平時食開嘅菠蘿包，或者高級魚子醬都可以拎嚟做雪糕！

真正菠蘿包雪糕 / 芒果紫米椰子雪糕　　XTC Gelato

Photos by cutely3001
真正菠蘿包雪糕用咗非常有香港特色嘅菠蘿包嚟做主題，雪糕唔單止加咗菠蘿蓉，仲真係食得出菠蘿包嘅酥皮碎！另外芒果紫米椰子雪糕就有東南亞特色，食落味道同芒果西米露有異曲同工之妙，不過西米雪凍變硬影響口感，要扣少少分。

五糧液朱古力雪糕 / 花雕話梅雪葩　　沙田18

Photos by EAT hard PLAY hard
溫馨提示，以下介紹嘅雪糕雪葩都有中國酒，小朋友同對酒精敏感人士要注意啦！五糧液朱古力雪糕以甜美朱古力突出五糧液嘅酒香，酒味唔會太濃郁淺嘗即止。而花雕話梅雪葩呢個配搭，花雕酒嘅醇香同話梅夾埋有酸酸甜甜嘅解膩作用。

桑莓啤酒雪糕 / 熊本大阿蘇牛乳雪糕　　The Little Corner

Photos by 阿咩
又一款18禁有酒精嘅雪糕，今次到清甜嘅Hoegaarden Rosée啤酒做主角，入口有果甜之外亦保留咗啤酒嘅酒香同微澀，加上粉紅色嘅Package超吸睛。另外熊本大阿蘇牛乳雪糕就用咗嚟自日本熊本縣嘅牛奶，自然特別香濃又唔會過甜。

Caviar Explosion / Ferrero Rocher　　Ice Monkey

Photos by supertaster mel & sukichoy0921
魚子醬整雪糕係咩玩法？Caviar Explosion用北歐產圓鮨魚子醬整軟雪糕，入口有魚子醬嘅鮮味，而奶味唔重，唔會搶咗魚子醬嘅風頭。如果驚又甜又鹹唔慣嘅話，可以試下Ferrero Rocher金莎口味，牛奶軟雪糕上面嘅朱古力醬加咗杏仁粒，上面再加多粒金莎，夠邪惡。

鴛鴦奶茶軟雪糕 / 培根巧克力軟雪糕　　Honey Creme

Photos by Yamaching & lokyanyan
呢間韓式蜂巢軟雪糕店其實亦有唔少創新雪糕，鴛鴦奶茶軟雪糕就喺牛奶軟雪糕當中加入港式紅茶同咖啡，茶香啡香平衡，仲可以加煙韌珍珠做鴛鴦波霸。而培根巧克力雪糕同樣以牛奶軟雪糕做主角，加上朱古力醬同焗過嘅煙肉脆片，得意得嚟口感豐富。

玄米白茶雪糕 / 伯爵茶朱古力雪糕　　慕茶

Photos by arislkk & reneelam96
餐廳名副其實以茶入饌，雪糕亦唔例外。玄米白茶雪糕清新得嚟有玄米香，口感軟滑帶少少玄米粒。而伯爵茶朱古力雪糕入口會先食到朱古力味，而伯爵茶醇香就慢慢滲出，加上有朱古力粒，味道口感層次更豐富。大部分茶味雪糕奶味都唔重，比較似雪葩。

波子汽水味軟雪糕 / 麥精維他奶味軟雪糕　　Check in Tokyo

Photos by gingerbreadso & DesireforFood
講起日本你會諗起咩飲品？雖然而家吹起抹茶風潮，但開飯仔細個去食日本料理最期待嘅，其實係波子汽水！呢間小店就有淺藍色嘅波子汽水味軟雪糕，有波子汽水嘅清涼又唔會過甜。唔單止日本口味，之前期間限定就出過同樣都係童年回憶嘅麥精味，味道同樣非常似。

50%濃度抹茶雪糕 / 玫瑰紅茶雪糕　　A Fun Store

Photos by eat_eat_everyday & Fullfoodie
之前日本就有七級唔同濃度嘅抹茶雪糕，引起呢間茶點亦自己研發出唔同濃度嘅抹茶雪糕！自問係抹茶控嘅當然要直接試最高嘅50%，超濃而且回甘悠長，不過唔慣嘅就會覺得太苦。而玫瑰紅茶雪糕勝在花味天然，不過兩款雪糕都比較易融，記得食快啲。

茶走雪糕 / 腐竹雞蛋糖水雪糕　　Lab Made 分子雪糕專門店

Photos by EAT hard PLAY hard & herbert
最後介紹兩款非常有香港風味嘅特色雪糕，茶走（唔知茶走係咩？睇茶餐廳舊式飲品介紹！）味有香濃奶茶味，最特別嘅係加埋煉奶同脆多士粒粒，更似茶走之外仲多咗份茶餐廳味道。而腐竹雞蛋糖水雪糕味道像真，加埋兩粒白果同雞蛋醬，完全就係用新方法解構傳統嘅佳例。

隨時接收最新資訊
讚好OpenRice專頁！