香港人無論氣溫幾多度都鍾意打邊爐，但面對疫情加上晚市禁堂食，不如考慮下有送貨服務嘅火鍋懶人包，唔使自己去買餸挨貴菜！開飯仔今次就幫大家精選咗九間商店，從和牛食到花膠再到雞煲，留喺屋企放心去「滾」。
76折A5和牛+黑豚肉Set 御之牛和牛專門店 
自問係牛魔王嘅話，就唔好錯過呢間和牛專門店推出嘅特級涮涮肉盛合。當中包括A5和牛西冷、A5和牛上等肩肉、A4和牛肩頸肉、鹿兒島黑豚肉眼等等，最貼心嘅係包埋自家製醬汁，分量足2-3人享用。用OpenRice餐飲券重有76折！
訂購方法：購買OpenRice餐飲券後WhatsApp至6365 3778安排送貨
一人一鍋任配搭 火鍋撚 
「一個人原來都可以盡興」，呢間港式火鍋店最近就推出一人一鍋套餐，唔使約飯腳想食就食。有齊自選湯底、鮮菜同主食，最高級嘅套餐重包埋安格斯肥牛、生蠔同海蝦！另外亦有闔府統請火鍋盛宴，一大家人食亦好方便呢。
訂購方法：官方網站
圖: 餐廳Facebook
花膠火鍋套餐 火水爐花膠館 
睇個名大概都估到餐廳主打花膠，湯底有最經典嘅濃厚花膠雞湯，亦有麻辣甚至酸菜魚花膠鍋任君選擇。配料都好豐富，包括北海道帆立貝、廣島蠔、虎蝦等等，肉類就睇返你揀咩套餐，最豪華嘅牛魔王餐可以食齊牛小排、牛頸脊、牛板腱、封門柳！
訂購方法：致電2568 3006或WhatsApp至6228 4084
圖: 餐廳Facebook
11款湯底台式小火鍋 十二鍋
呢間舊年新開嘅火鍋店主打台式小火鍋，最吸引嘅係外賣套餐湯底有十一款選擇，包括麻辣香濃嘅台式麻辣湯、有花膠同蟲草花嘅牛乳美肌湯、有保健功效嘅紅麴番茄湯等等。再加埋Prime三角肩胛肥牛、自選小食、配料同主食等，好豐富。
訂購方法：致電2669 2118或用指定外賣平台安排外送
圖: 餐廳Facebook
懷舊風格港式火鍋 十下火鍋
呢間火鍋店走港式懷舊風格，唔單止裝修，連配料都會有果皮魚蛋、手切本地牛頸脊等。精選套餐湯底選擇都好多元化，由包括海鮮控大愛嘅卜卜蜆煲、清甜嘅蟹肉瑤柱冬瓜湯、滋潤嘅木瓜蕃茄鮮魚湯，到經典嘅胡椒豬肚湯都有得揀。
訂購方法：WhatsApp或Signal至5402 0239
圖: 餐廳Facebook
全牛火鍋盛宴 616牛肉火鍋專門店
就算唔係牛魔王，都好可能聽過呢間牛肉火鍋專門店嘅大名。佢哋推出嘅外賣套餐當然都可以食到多款牛肉，但最推介嘅都係期間限定嘅全牛火鍋盛宴套餐，可以食勻澳洲和牛牛頸脊、五花趾、牛駝峰、匙柄、牛舌、牛朴肉等坊間少見嘅部位啊。
訂購方法：用指定平台提交訂單後預約司機取貨
特色湯底套餐 怡紅院火鍋料理
中環呢間火鍋店以青樓為裝修主題有Gimmick之外，其實湯底同配料都好有特色。重口味可以嗌城寨特濃沙嗲鍋，而芫荽黨黨員必點酒綠皮蛋芫荽山！外送可以散嗌亦有套餐，無論有幾多人甚至有大胃王都無問題啦。套餐仲會送支裝啤酒或汽水，飲品都唔使自己買喇。
訂購方法：致電或WhatsApp至6014 2286
圖: 餐廳Facebook
各款配料應有盡有 火鍋本色
呢間火鍋店標榜外送Menu同餐廳堂食嘅一樣！由游水海鮮、本地手切牛肉、手工丸、餃子、蔬菜、小食全部有齊。當然唔想自己諗亦可以嗌精選套餐，湯底選擇有清甜滋潤嘅海底椰雪梨湯，另一推介係奶白鮮香嘅大魚頭豆腐湯，配料當中仲有本地老字號樹記嘅原味/紫菜響鈴！
訂購方法：致電2573 2844或WhatsApp至9736 8033
圖: 餐廳Facebook
人氣惹味雞煲 陸陸雞煲火鍋
鍾意食雞煲就必試呢間雞煲名店啦，主打改良過嘅四川風格麻辣雞煲，用加入三十種香料嘅自家醬料炒成，香濃惹味、辣度由BB辣到大辣都有。不過留意返雞煲本身就只有雞同醬料，想打邊爐要自己加雞湯，而且無套餐要自己選擇配料唷。
訂購方法：官方網站
文: Cathy.H
