掃街係唔少香港人都好喜愛嘅動作。未夠鐘食飯又掃一掃，食飽飽又要掃一掃，總之，行喺條街度見到一間間嘅小食店就會忍唔住，乜都想食！今次掃街熱點就嚟到元朗啦！
8吋大熱狗 J大大
食嘢梗係貪佢愈大件愈正啦！呢間熱狗店就咁聽個名就知佢「大」啦！8吋長嘅熱狗腸上，配上唔同嘅配料，好似芝士、炸雞、吞拿魚等，最推介都係「招牌J熱狗」！淋上熱辣辣嘅芝士，再灑埋煙肉碎，味道香濃，芝士仲可以拉絲添呀~
冬菇豬肉燒賣 元朗燒賣皇后妙舒
講到食燒賣，元朗人實識呢間燒賣舖！自家製燒賣大大粒，食落有真．豬肉味。平時蒸燒賣都食得多喇，嚟到記住要食「燒燒賣」！外脆內軟呢，有啲似bbq時燒燒賣嘅感覺。
邪惡炸雞髀 三多炸肶
出得嚟搵食，都係想放縱… 我指放鬆下自己~ 呢間小食舖由大埔開到元朗，大西北嘅friend子唔使山長水遠先食到咯！大大隻炸雞髀，有成隻手掌咁大，外皮炸得非常酥脆，而且皮薄，咬落啖啖肉好juicy！
啖啖肉蠔餅 肥姐蠔餅婆
食蠔餅最緊要就係「蠔多粉少」啦，而呢間蠔餅店就做到啦！成塊蠔餅都係蠔仔，而且粒粒都好肥美；粉漿適中，唔會食到成口粉，口感一流~配埋佢哋特製嘅醬汁同芫荽，認真香口。
芋圓控大愛 摩登士丹里
台式飲品一直都喺香港大熱，呢間飲品店仲要係主打芋圓添！珍珠奶茶入面加埋煙煙韌韌嘅芋圓，幾有咬口。最受歡迎莫過於「黑糖珍珠小芋圓牛乳」，啱晒好甜之人~飲品店仲推出唔同嘅懷舊港式飲品，好似鴛鴦、忌廉溝牛奶咁。
文﹕Kiko
編：Kar