只帶爸爸食好西慶祝父親節，係唔夠㗎！仲要送下禮物或者食多個蛋糕啦～十個爸爸有九個都鍾意飲酒嘅，開飯仔今年就特別搵咗各款同酒有關嘅禮物介紹畀大家，成支真‧酒又有，酒味蛋糕同朱古力都有！

酒樽專屬刻字 軒尼詩X.O  至醇酒庫

淨係送酒唔夠誠意？加埋個人化雕刻服務又點睇？呢個經典X.O品牌推出嘅雕刻服務，可以喺酒樽上面刻字，刻一家人嘅名，或者對爸爸嘅祝福都得，夠晒紀念性。加上X.O味道豐腴柔厚，又有層次，今次仲唔加晒分！？門巿定網上購買都一樣可以享有刻名服務呀。

加強型葡萄酒 Penfolds奔富酒莊  屈臣氏酒窖

每個爸爸嘅口味都唔同，呢隻澳洲殿堂級葡萄酒品牌推出嘅加強型葡萄酒——「Father Grand Tawny」，喺橡木桶陳釀多年，層次分明，豐富，口感甜潤，比一般嘅葡萄酒有更濃嘅乾果香。同爸爸食完大餐，再一齊小酌幾杯係幾溫馨嘅～

大人系甜酒蛋糕 BAILEYS

唔想成支隊嘅，酒香蛋糕都係個唔錯嘅選擇。BUTLER 同甜酒品牌BAILEYS就推出全新甜品——The BAILEYS Original Cake同Chocolate Meets BAILEYS Cake，前者散發著醇厚酒香，而後者就超濃郁朱古力味，兩隻都好吸引～訂購方法 (按此)

「醺．環星」蛋糕  Chroma

要數最精緻嘅父親節蛋糕，非佢莫屬啦！呢個「醺．環星」蛋糕上放有74%黑朱古力小熊裝飾，再配以朱古力噴砂鏡面、內層有威士忌馬斯卡彭慕斯、成士忌奶凍、威士忌朱古力杏仁蛋糕等等，仲加入咗12年嘅The Macallan Sherry Oak製成，啖啖都散發住威士忌唔同嘅香氣，成件事又靚又夢幻仲好有層次！

鹹檸啤蛋糕 Twinkle Baker Décor

呢個啤酒造型嘅蛋糕，爸爸一見實夠晒醒神！係呢間餅店聯乘少爺啤Young Master Brewery推出嘅「乾吧。爹」蛋糕，堅有酒精成份架，用咗少爺嘅鹹檸啤製作，好似滿瀉嘅泡係鹹檸啤蛋白霜，入口即化；主體係柚子鹹檸啤慕絲蛋糕，清新香甜又鹹鹹酸酸，仲夾有鹹檸啤啫喱添。如果21號前買，仲有機會送多支鹹檸啤，可以邊食邊飲！

酒樽朱古力 Schoggi Meier

成日都話阿女係爸爸嘅前世情人，送朱古力一樣啱數呀！呢個朱古力品牌推出一系列造型朱古力，造型玩味十足！最特別就一定係「72% 黑朱古力酒樽」啦！超逼真朱古力酒樽造型，真係要「爆樽」先知內有乾坤呀！酒樽內有六款酒心朱古力，每款都有相當一定嘅酒精含量，有whisky有champagne等等口味，酒鬼爸爸實話過癮！

文﹕Kiko
編：Kar