鍾意飲酒嘅朋友揮個手嚟睇下？開飯仔又有新蒲點介紹過你哋啦~ 最近喺銅鑼灣開咗間酒吧餐廳，酒啦咖啡啦茶啦都有得飲，仲要有好多新玩法，充滿新鮮感。

飲酒前食少少嘢先，唔好空肚飲酒嘛，不過提一提，佢哋嘅嘢食同樣都有加入到啤酒嘅元素落去㗎。好似個burger咁，用上美國嘅和牛、法國嘅芝士，同埋重點，自家秘製嘅IPA醬汁，夾埋一齊食又幾香口。另外仲有牛角包面又灑上啤酒花，食muffin亦有支啤酒醬汁「針」畀你自己唧入去、

送酒最啱嘅薯條同Nachos都食得過呀，前者配有三款醬料，包括煙燻墨西哥辣椒醬、香蒜同Raspberry 檸檬，後者就咁點牛油果醬就已經好夠味。

至於酒方面，呢間餐廳主要提供4款由比利時入口嘅手工啤酒，包括比利時傳統金啤 (Blonde)、印度淡色愛爾啤酒 (IPA)、白啤酒 (White)同埋樹莓啤酒 (Raspberry) 。

慣常飲開嘅酒鬼要揀就當然冇難度啦，但對於初哥嚟講，望住呢幾個名完全冇概念係咩味道嘅，都唔使驚，行去後面有個香味實驗室corner，你可以聞下幾款「香水」嘅味道，揀咗你最鍾意嗰隻之後，反一反轉個牌，就會有建議你聽邊款啤酒最啱你口味喇！都幾準下。

而行過隔籬另一個corner，就可以加幾滴「香水」落你揀好咗嘅啤酒杯身度，「香水」選擇有朱古力、黑胡椒等味道，從而提昇啤酒嘅味道。開飯仔試過加朱古力味，就咁幾滴又真係幾香朱古力味，但原來有少少tricky嘅地方，試下忍一忍住呼吸咁飲，陣朱古力味又好似消失咗，變返原本嘅啤酒咁。係嗅覺影響咗味覺呀，呢個實驗又幾得意。

另外仲有一系列嘅cocktail同beertail。Mr.Barbieri係一款都幾受女生歡迎嘅beertail，加入咗提子汁入白啤酒度，降低咗酒嘅苦味，同時亦滲有花香同果甜。至於cocktail方面，可以試下Berry Me Alive，dark rum加烈酒，仲有啲raspberry同椰絲等等，再放埋檸檬皮入去，賣相搶分，酸酸甜甜，味道相對複雜。

仲仲仲有，餐廳隔籬有個Farmacy室內水耕農園，入面種植咗超過160種嘅食用花卉、香料同香草，以樹皮複合物代替泥土，加上多種營養劑咁去種，有部分cocktail使用嘅香料香草等，都係出自呢個農園㗎。

遲下仲有會座互動式迷你啤酒廠，畀客人可以喺度製造出屬於自己嘅手工啤酒。而如果你有幸被邀請成為VIP嘅話，仲可以印製個人專屬嘅啤酒樽添~

The Artist House
地址：銅鑼灣京士頓街9 號Fashion Walk 一樓 G4 舖

文、相：Kar