好多時素食畀人嘅印象就係沉悶，但銅鑼灣呢間新開嘅素食自助餐就可以打破想像！餐廳主打新派素食自助餐，希望可以突破傳統框框，畀食客新嘅素食體驗。除咗傳統中式素食，仲有日式區域供應各款素食壽司，最平午市$78就可以食75分鐘，好抵食！而且每日嘅選擇都有六十幾款～
首先要Highlight呢個壽司區域，有駐場壽司師傅即場製作，務求將壽司嘅味道做到最象真。三文魚壽司以蒟蒻代替魚生，味道同三文魚有八成似。親子花之戀就用海藻珠代替魚子，口感爽口，散發淡淡鮮味。
特色乾果壽司選用風乾嘅生果，如士多啤梨、奇異果等等，滲出淡淡果香；味道清新，新奇又特別。而呢個彩虹加州卷外層沾上色彩繽紛嘅米通，食落外脆內軟，口感豐富。
餐廳都有供應傳統中式素菜，有兩位師傅都係喺寶蓮寺有多年煮素菜經驗，味道有一定保證。
鍾意食香口嘢嘅朋友都有好多選擇，如芝麻球、南瓜餅、炸春卷同沙嗲串燒。
餐廳每日都會送一款特色素食，如星期一至五就會隨機送冰鎮咕嚕肉、手撕素雞或燉湯。冰鎮咕嚕肉係將炸好嘅素肉冰鎮，就算放一陣外皮都係keep住咁脆；手撕素雞就用菇類代替，加入秘製醬料後好開胃；燉湯每日即燉，味道鮮甜，一啲味精都無～
而星期六、日就會每人送一隻素鮑魚，彈牙滑溜有口感，味道同真鮑魚有九成似㗎。
最貼心嘅係，餐廳會喺每款食物隔離貼上標記，表明食物係含有蔥蒜、蛋或奶類，咁無論食客係邊種素食者都無有怕啦！
收費詳情:
午市 (75分鐘) 早上11時至下午2時30分 星期一至五 $78 星期六日及公眾假期 $98
下午茶 (90分鐘) 下午2時30分至下午4時30分 星期一至五 $68 星期六日及公眾假期 $78
晚市 (90分鐘) 晚上6時至11時 星期一至五 $168 期六日及公眾假期 $188
地址: 銅鑼灣謝斐道535號Tower 535地庫B04號舖
文、相、片: Yanica