召集各位咖啡迷！銅鑼灣有個期間限定嘅咖啡市集，集合本地10間人氣咖啡店同品牌，唔少都有市集限定嘅咖啡或者套裝。仲有部咖啡烘焙車即場炒豆，令現場充滿咖啡香氣。仲可以用限時優惠價買Coffee Pass，去指定咖啡店換領咖啡，嚟個Cafe Hopping！
利園區舉辦利園咖啡生活節，打頭炮嘅活動就係位於希慎廣場1樓中庭嘅咖啡主題市集，唔使走勻港九新界，就集齊香港多個咖啡品牌，可以試到嚟自世界各地嘅咖啡風味，仲可以買到咖啡精品。
市集率先推出推出咖啡膠囊！以後喺屋企都可以品嘗到即沖House Blend，Body較厚，帶堅果同黑朱古力風味，配搭牛奶變Latte得，加落Tonic Water變Coffee Tonic亦得，得咗。
亦有新出嘅自家Granola同曲奇選擇，前者有原味同抹茶兩款口味，配乳酪或者牛奶食都好夾。而曲奇就係一盒有齊三款口味。
咖啡店位於觀塘，選用倫敦精品咖啡烘焙商Squareile嘅出品，例如招牌冰滴咖啡就用咗Sweetshop blend冰滴8個鐘。飲落有明亮水果酸甜味道，帶微微酒香。另一推介係特濃黑朱古力奶，選用法國Weiss 72%嘅黑朱古力製作，味道香醇。
主打係四款唔同產地嘅冷萃咖啡，包括最新嘅洪都拉斯蜜處理豆，帶酒香同布冧味。另外三款分別係帶花香嘅衣索比亞、堅果同朱古力風味嘅巴布亞新畿內亞，同偏果香味嘅肯亞。另有加入CBD油嘅咖啡掛耳包、冷萃咖啡包，同冷萃咖啡啤酒。
呢間澳式咖啡店選用嚟自墨爾本Small Batch嘅咖啡豆，透明樽裝冷萃咖啡有兩款選擇，Nelson係哥倫比亞豆，偏Nutty同時又有花香。另一款係Danche，產自衣索比亞，偏果香而且口感更為順滑。亦有掛耳包可以買走自己沖。
本地有13年經驗嘅咖啡烘焙品牌，嚟到市集主打嘅當然係自家烘焙咖啡豆。其中一款推介係薩爾瓦多嘅蜜處理豆，有血橙嘅酸甜同茶感，餘韻較甜。另一推介係巴布亞新畿內亞嘅日曬豆，帶莓果甜香，味道似果茶，兩款都相對易入口。
本土人氣咖啡店今次市集就兩款新品，分別係哥倫比亞豆掛耳包同環保材質嘅咖啡膠囊。前者係水洗處理，入口有濃朱古力香氣。而後者嘅外殼係用植物製造，100% 可生物降解及可堆肥，享受咖啡嘅同時亦支持環保。
位於大坑嘅手沖精品咖啡體驗館今次就帶嚟三款冷萃咖啡，當中巴拿馬90+同哥倫比亞Finca Monteblanco呢兩款仲係市集限定！巴拿馬90+係藝妓咖啡，帶紅酒同車厘子風味。而哥倫比亞豆用乳酸發酵法處理，飲落會有菠蘿、木瓜、乳酪嘅味道，相當特別。
喺屋企或者辦公室都想沖咖啡但又怕麻煩？呢間咖啡店就有市集限定嘅掛耳包套裝，一套有齊咖啡掛耳包、陶瓷杯同手沖壺。咖啡嚟自美國Sweet Bloom Coffee Roasters，而STTOKE陶瓷杯可以保暖3小時，輕身防碎，仲唔怕有金屬味會影響杯啡呀。
攤檔有唔少咖啡用具，不過最吸引嘅反而係最新推出嘅手工意式雪糕。香港製造、不含牛奶或人造香精，有六款唔同口味，包括日本抹茶、開心果、士多啤梨，同Cafe最多人打卡嘅Crazy Chocolate口味！
主打日系咖啡及咖啡沖煮器具，今次市集限定有自家品牌嘅咖啡豆同咖啡掛耳包，由日本知名咖啡職人烘焙後再空運到港，所以包裝上以Boarding Pass為設計靈感。掛耳包一套四包，分Nutty同Fruity兩大類別，可以按自己喜好挑選。
市集中間係咖啡烘焙車，不時即場烘焙咖啡豆。想要嘅話只要喺市集消費滿$300，同時又係Lee Gardens Club會員（即場登記亦得），就可以換領一包啦！
希慎廣場、利園一期至三期亦有多間咖啡店畀大家嚟個Cafe Hopping，包括N.O.T. Specialty Coffee、Cupping Room Coffee Roasters、NOC Coffee Co.、La Maison du Chocolat等。
N.O.T. Specialty Coffee - Iced Latte
素啡工場 X Bageliciouz Pop-up - 冷萃洪都拉斯咖啡
HABITŪ table - 巴西莓玫瑰豆奶咖啡（期間限定）
Lee Gardens Club會員仲可以喺市集用限時體驗價$199購買Coffee Pass，裡面會有9張唔同餐廳嘅電子咖啡優惠禮券，可以去9間精選咖啡店同餐廳換領指定咖啡及飲品，總值高達$400！
其中一間指定咖啡店NINETYs Roastery
利園咖啡生活節 - 咖啡主題市集
日期：即日起至2021年8月1日（11:00-21:00）
地點：銅鑼灣軒尼詩道500號希慎廣場1樓中庭
文、相：Cathy.H