各位肉食獸有食神喇今次，銅鑼灣呢間燒肉放題店，最近推出日本A4黑毛和牛放題，可以瘋狂咁食靚牛都算，仲要連燒蠔、刺身、壽司同黑豚豬都有得任食，兼且入座每位送5款海鮮同Movenpick雪糕，400蚊有找啊親。

今次任食嘅A4黑毛和牛，主要係嚟自日本宮崎同鹿兒島，有唔少部位選擇，想食幾多叫幾多，唔夠再翻啅都得。喺咁多款和牛中，開飯仔試過晒後，最推介嘅就係精選黑毛和牛腿，肉質軟嫩，入口溶化，食多幾片都唔太覺膩。

其次就係A4鹿兒島黑毛和牛嫩肩肉同埋A4鹿兒島黑毛和牛肉三角，前者油花均勻，食落有咬感；而後者就油脂重得嚟肉味亦好濃郁下。

叫得自己做牛魔王就梗係要試勻晒咁多款啦~

 A4宮崎黑毛和牛脊肉：帶油脂、肉質嫩

 A4鹿兒島黑毛和牛板翼：肉厚、有質感

 精選一口黑毛和牛：點少少岩盬食增加層次

 A4鹿兒島黑毛和牛背峯：油脂豐富

 西班牙伊比利亞一口黑豚、西班牙伊比利亞黑豚扒

好多肉食獸同時都係海鮮控，呢個放題就可以滿足晒兩個願望，任食燒蠔不是夢啊！燒好後建議可加少少蒜蓉調味，會更加惹味。

入座每位會送5款海鮮，例如有鮑魚、帶子、海蝦等，都係相當新鮮同鮮甜。燒肉高手嘅話，隻鮑魚燒完後，裙邊位置仲會有少少脆口，而肉身較腍，雙重口感。至於甲羅燒就每兩位一隻，蟹膏混埋鵪鶉蛋、蟹籽等，香甜濃郁，甚有日本風味。

等緊燒肉，未有得食住嗰陣，可以食住刺身同壽司先吖，選擇多多，最緊要都係任食吖嘛。

食完成餐冇甜品硬係好似爭緊啲咁？唔怕，每位會送杯Movenpick雪糕啊~

尚鮮日式燒肉漁市場
地址：銅鑼灣謝斐道496號金利文廣場3樓

文、相、片：Kar