呢間主打親民價鐵板燒嘅餐廳最近喺銅鑼灣開旗艦店，佔地14,000呎，主要分為五大區域：鐵板燒區、壽司吧、炭火燒區、清酒吧同品酒區。鐵板燒方面$380起就食到南非鮑魚、牛肉薄燒等10道菜套餐！壽司吧同炭火燒區同樣有水準，前者有大倉正孝師傅坐鎮，後者選用日本紀州備長炭。
 

板神鉄板燒日本料理銅鑼灣旗艦店請嚟著名室內設計師梁志天先生設計，以火山為主題。值得一提係有八間鐵板燒獨立房，包括三間VIP房，最大嘅最多可以坐到24人！
 

鐵板燒區

特選套餐（$380/位）

同觀塘、灣仔店一樣，銅鑼灣店依然供應抵食鐵板燒套餐，$380起就可以食到10道菜：前菜、季節沙律、南非鮑魚、帶子/大蝦/法國鵝肝（三選一）、季節野菜、牛肉、炒飯、漬物、湯、甜品/咖啡/紅茶。
 

南非鮑魚

南非鮑魚非常新鮮，放上鐵板之前仲郁緊㗎！師傅先煎後焗，令鮑魚肉厚爽甜。
 

帶子

大蝦

法國鵝肝

其中一道菜係帶子、大蝦、法國鵝肝三選一，帶子配搭黑魚子醬增添鮮味。大蝦煎嘅時候就會加入以蝦膏熬煮而成嘅醬汁，令爽脆蝦肉味道更香濃。法國鵝肝油脂豐富入口即溶，加上麵包可以吸走多餘油分。
 

美國牛肉（薄燒）

A5和牛（厚燒）（+$220）

美國牛肉薄燒選用肉香濃厚嘅肉眼部位，捲入蔥粒同炸蒜片，牛肉嘅肉汁同蒜香係絕配！而如果想感受入口即溶嘅感覺，就建議大家升級食A5和牛厚燒，西冷油花分佈平均細致，肉質非常柔軟。
 

炒飯

甜品：焦糖多士

炒飯加入雞蛋、洋蔥等多款配料炒成，飯粒乾爽唔油膩，鑊氣十足。甜品就係麵包灑上上白糖以牛油煎成嘅焦糖多士，焦糖面脆得嚟又夠香甜。
 

壽司吧

特上手握壽司御膳（$450）

壽司吧由有超過四十年經驗嘅大倉正孝師傅及何沛輝師傅主理，主打江戶前廚師發辦。呢個午市套餐就可以食勻時令手握壽司9件、麵豉湯/稻庭烏冬、前菜、沙律、蒸蛋、甜品/咖啡/紅茶。
 

手握壽司（食材因應季節而定）

壽司會用精選時令食材，例如拍攝呢日就有嚟自青森縣嘅大拖羅，肥美鮮甜。赤鯥火炙後帶出魚油香，口感細膩。而壽司飯選用北海道七星米，粒粒分明、香軟彈牙。
 

板神便當（$480）

呢款豪華便當就最啱貪心嘅朋友，一套有齊前菜、季節沙律、蒸蛋、刺身4款、壽司4件、天婦羅、銀鱈魚西京燒、美國牛肉薄燒、麵豉湯、甜品/咖啡/紅茶。
 

刺身同壽司都相當新鮮，天婦羅麵衣酥脆唔油膩，銀鱈魚西京燒嘅魚油香同甜味平衡，美國牛肉薄燒加上炸蒜非常香口。
 

炭火燒區

炭火燒輕鬆時段套餐（$238）

炭火燒區主打用紀州備長炭製作嘅串燒，備長炭少煙而且耐燒，最高可以燒到900度，快速鎖住食材水分。而且有本地新鮮三黃雞嘅各個部位選擇，另一推介係呢個旗艦店限定嘅Happy Hour套餐，有5串備長炭串燒同日本清酒（300mL）。
 

備長炭串燒

串燒有日本黑豚肉、雞翼、雞腎、青椒仔、粟米，火候控制得宜，而且有淡淡炭火香。而清酒有4款選擇：玉乃光 純米大吟釀、玉乃光純米吟釀94（串）、久保田千壽吟釀、極聖夢二旅情純米吟釀，當中玉乃光純米吟釀94（串）就係專門為配搭串燒而設計嘅！
 

清酒吧

品酒區

板神鉄板燒日本料理
地址：銅鑼灣告士打道255-257號信和廣場1樓103號舖

文：Cathy
相、片：Tom Li