各位蟹迷今年應該都幾谷氣，食唔到最新鮮嘅大閘蟹，總係覺得唔夠喉！但蟹迷們可轉戰銅鑼灣呢間新開嘅日式蟹店，有日本有名嘅松葉蟹、毛蟹、鱈場蟹等各款蟹物，而且部分蟹饌仲係由日籍料理達人設計，正宗得嚟又夠浮誇！唔信？自己睇相啦！

餐廳從日本、韓國、俄羅斯引入各款生猛螃蟹，並由日籍料理達人Kei San監製及設計蟹饌，務求做出北海道漁民即捕即食嘅風格。

店子四大必食！

1. 鐵罐酒蒸原隻毛蟹

先用鐵罐煮熱清酒，再用火槍燒出熊熊烈火，然後放入原隻毛蟹。

「火勢」相當強勁，將清酒逼入毛蟹，令蟹肉鮮味更為突出。大約13-15分鐘後就可以取出、食得。

餐廳仲會好體貼咁幫客人拆蟹，蟹膏、蟹肉、蟹腳都分好晒，靚！沾少少餐廳調配嘅梅酒及蟹醋，更引出蟹肉鮮味。價錢為$980。

2. 甲羅溫清酒

跟足日本北海道漁民食蟹方法，以浜燒方式，將蟹殼放喺爐上燒熱，放入蟹膏，再加入清酒拌勻。當清酒表面上有少許氣泡就啱飲。

暖暖清酒，仲有鮮甜蟹膏，飲完成個人暖笠笠。價錢為$68/2個。

Kei San話呢種正正係北海道漁民好喜愛嘅一種飲清酒方法，北海道當地漁民捕獲螃蟹後拆蟹膏、蟹肉，有時蟹殼上仲有少少蟹肉蟹膏，用蟹殼裝住清酒飲嘅時候可以一併食埋，可算是食到盡呀！

3. 煙燻半隻毛蟹

餐廳以櫻花木去煙燻毛蟹，令蟹肉鮮甜之餘仲帶有少許煙燻香氣，最重要就係打開碟蓋，仙氣不斷湧現，影相、拍片一流。價錢為$498。

4. 炸澤蟹

當收到客人柯打，餐廳會拎裝住澤蟹嘅蟹盤出嚟，客人可用木匙潷起澤蟹兩次，廚房就會用客人潷起嘅澤蟹烹調。炸澤蟹($68)口感香脆而不太油膩，連蟹殼都食得，有得玩又有得食，又幾盞鬼喎！

太多選擇唔識揀？餐廳設3款套餐：蟹會席　彩、蟹會席　雅及蟹會席　極，每個套餐都有前菜、刺身、蟹肉蒸蛋、丼飯/鍋物、燒蟹腳、甜品等8-10款菜式，蟹迷肯定夠喉兼飽肚。

呢份蒸毛蟹，上碟時會有一小盤蟹肉、少許蟹腳，以及最精彩嘅蟹殼及蟹膏。師傅會預先喺廚房拆蟹、剪蟹腳，客人只需用餐廳提供嘅拆蟹工具就可以輕鬆食到啖啖蟹肉，好方便！

呢道燒鱈場蟹腳會喺食客面前即席浜燒蟹腳，一邊燒，一邊剪開蟹殼，並將蟹腳燒至7-8成熟就完成。蟹腳鮮甜，亦好juicy，仲有少少海水味，唔使沾醬料都好夠味。

蟹肉海幸丼有滿滿嘅松葉蟹肉、三文魚子，仲有幾片北海道馬糞海膽，分量好多，好滿足。底層跟嘅並非一般嘅珍珠米飯，而係炒飯嚟架，更加滋味。

蟹甲羅味噌燒，喺蟹殼上面放滿蟹膏、鵪鶉蛋及蔥，再擺喺爐上燒，蛋汁令蟹膏更滑、更濃。

將蟹膏放上多士一齊食，味道更佳。記得影相要快呀，脆卜卜嘅多士好易腍，擺得耐就無咁好食架！

蟹肉蒸蛋看似普通，味道卻鮮味依然。事關蟹肉分量多，再加上白果、雜菇、三文魚子等配料，口感豐富，又香又滑。

松葉蟹蟹鉗及蟹腳天婦羅，用櫻花蝦炸松葉蟹棒，並以米通炸蟹鉗，口感香脆，又不算好油膩。另外仲有切片嘅炸冬菇、炸青瓜添！

蟹會席　彩有前菜三點、鉢碟小料理、蟹及精選四點刺身、蟹肉蒸蛋、蒸蟹、燒松葉蟹腳、蟹肉海幸丼及甜品。不過要注意，餐廳做法跟足日本餐廳，菜式會以當日時令、新鮮食材入饌，所以前菜、刺身會不時轉換架！價錢為$688/半份、$1,376/兩人份。

蟹會席　雅大部分菜式同蟹會席　彩相若，差在蟹會席　雅會有燒鱈場蟹腳、松葉蟹蟹鉗及蟹腳天婦羅以及松葉蟹蟹鍋跟雜炊粥。價錢為$888/半份、$1,776/兩人份。

Behind-The-Scene

採訪當日，開飯仔叫咗杯玫瑰燒酌熱割。驟眼睇好似玫瑰花茶，但入面有少許日本燒酒，暖暖嘅燒酒飲落好香醇，好易入口，飲完仲有啲灼熱感，好啱女生飲。

蟹慶
地址：銅鑼灣軒尼詩道525號澳門逸園中心地庫

文：Joy