夏天唔單止為大地帶嚟雨水，仲帶嚟唔少新品牌雪糕。繼之前日本CREMIA雪糕進駐太古之後，今次到韓國熱門品牌百味堂去尖沙咀開Pop-up！7月1號開幕嘅期間限定店唔算太大間，但雪糕、奶昔、蛋糕、咖啡等全部有齊，嚟多幾次Tea Time都唔怕悶！
 

百味堂其實係1964年成立韓國南陽乳業旗下嘅新品牌，標榜用100%韓國農場直送有機牛奶製造，而香港Pop-up店用嘅材料亦同韓國一樣。最受歡迎嘅原味牛奶雪糕有筒裝同杯裝，食落比較挺身，但依然有相當香濃嘅牛奶香味，口感柔滑。
 

而栗子、士多啤梨、奇異果同蜜瓜係季節限定口味。比較特別嘅係栗子，唔單止喺原味雪糕當中倒入栗子蓉，上面再加混入海鹽嘅新鮮栗子粒，同即場刨嘅栗子碎。食落口感層次豐富，而且甜中帶少少鹹，味道特別。
 

唔鐘意太甜嘅朋友仔仲可以一試佢地嘅濃縮咖啡Affogato，喺雪糕上面淋上即場沖製嘅濃縮咖啡。老實講賣相就唔算非常吸引，不過一熱一凍，一苦一甜，舌頭感覺得到兩種衝擊，最後混合成一種甜中帶少少回甘嘅餘韻。仲有帶韓國特色嘅米糖薑末同紅棗脆、大路嘅朱古力同Tiramisu等共13款口味。
 

另外仲有四款口味嘅奶昔：原味、濟州抹茶、香蕉、士多啤梨同濟州抹茶，全部都會加入原味軟雪糕一齊打，細細杯但飲落非常濃稠。可惜士多啤梨味道嫌偏酸，而濟州抹茶回甘度亦可以再高返啲。
 

Tea Time又點少得蛋糕呢？呢度亦有六款蛋糕，同樣有濟州抹茶同士多啤梨口味。另有原味、朱古力、香蕉、果麥乳酪同朱古力薄碎口味。
 

唔少韓國人都離唔開咖啡，百味堂Pop-up店亦有多款咖啡選擇，由手沖咖啡到大路嘅鮮奶咖啡等都有，大家仲可以坐喺吧枱睇住咖啡沖製過程。
 

百味堂
尖沙咀河內道18號K11購物藝術館地下中庭
活動日期：2017年7月1日至9月30日

文、相、片：Cathy