週末打卡又有新熱點！韓國最大型沉浸式數碼藝術博物館ARTE M近日登陸香港，以光影、聲效、氣味等多媒體藝術去演繹自然美。去睇展覽前後想喺附近搵間餐廳醫肚亦有唔少選擇，開飯仔就幫大家精選其中六間，由主題餐廳、人氣甜點，到打卡Cafe一應俱全！
圖: Arte Museum
ARTE M香港展館約9,000平方呎，以「超越時空嘅永恆自然」為主題，分為海浪、繁花、叢林、沙灘四大空間，結合視覺效果、聲效，甚至特別調製嘅香氣，帶大家體驗多感官嘅大自然之旅。
Glamping主題西餐廳 CAMPSITE 
唔想行嘅話，就可以嚟展館地下呢間以Glamping為主題嘅西餐廳，唔少菜式都融入營火烹調嘅概念，好似火焰北美大肉蟹、營火芝士焗管麵、鐵鍋鮮魚西班牙辣肉腸野米飯，甜品綿花糖朱古力夾餅更係有埋火畀大家自己燒！餐廳亦以露營用品為裝飾，幾有Feel㗎。
火焰北美大肉蟹、營火綿花糖朱古力夾餅（圖: xmelissalamx）
馳名鹽焗雞飯 津津茶餐廳
2006年居港日本藝人SOKO和泉素行呢條有關滾水蛋嘅短片爆紅，拍攝場地就係呢間1982年開業嘅茶餐廳，而佢哋最出名嘅，就係幾乎每枱都會嗌嘅鹽焗雞飯。再刁鑽啲，就可以嗌鹽焗珍肝雞髀飯！佢哋嘅鹽焗雞係用湯浸熟，雞肉零舍嫩滑，配埋自家沙薑醬一流。
同藝術館距離：220m，步行約3分鐘
鹽焗珍肝雞髀飯（圖: ivanyung214）、菜乾豬肺湯（圖: Kan Lee）
新鮮天然發酵麵包 Levain Bakery
呢間麵包店喺鰂魚涌嘅分店地方比較大，既有工場新鮮製作麵包，亦有堂食座位畀大家坐低食個Brunch或者Tea。主打以天然食材同酵母製作嘅酸種麵包，不添加增味劑。堂食有各種酸種吐司，散裝糕點更多元化，從牛角包、曲奇、貝果、可麗露都應有盡有。
同藝術館距離：300m，步行約4分鐘
Sourdough with smoked Salmon and Avocado（圖: ahmanxd），另有多款麵包糕點方便買走（圖: 沛楹）
更多【開飯專題】： |
正宗巴生肉骨茶 馬來亞春色綠野景緻艷雅
見到餐廳名就會忍唔住唱出嚟，而小店顧名思義主打馬來西亞菜。最多人嚟食正宗巴生肉骨茶同叻沙，前者係三代家傳嘅秘方，湯頭偏福建風格，深色而帶當歸、八角等藥材甘甜香；後者勝在有唔同配料選擇，湯底充滿椰香，微辣惹味。
同藝術館距離：300m，步行約4分鐘
正宗巴生肉骨茶、炸魚餅併魚片叻沙麵（圖: hoikiwong522）
人氣爆餡脆皮泡芙 治癒菓子
先提提大家小店每日有唔同出爐時間，售完即止，唔想撲空最好先預訂。由網店開到實體舖，靠嘅就係佢哋選用日本麵粉，以低糖低油配方、無添加色素製作嘅脆皮泡芙！通常每日會有四款口味配搭，裡面都會有埋麻糬，外脆內軟更有口感層次。
同藝術館距離：450m，步行約6分鐘
小山園抹茶Tiramisu麻糬泡芙、粒粒花生海鹽焦糖咖啡麻糬泡芙（圖: blu.foodie）
粉紅摩洛哥風Cafe Enthusiasm Cafe
呢間年中新開嘅Cafe裝修以摩洛哥民族風為主，擺設都充滿異國風情，加上粉紅色主調，室內室外都有唔少打卡點！室外外賣區域更係寵物友善，可能會遇到毛孩同主人一齊嚟開餐。食物以輕食為主，例如全日早餐、意粉、窩夫、Croffle等，定價合理。
同藝術館距離：600m，步行約7分鐘
煙三文魚青瓜忌廉芝士酸種麵包配柚子醋汁沙律（圖: apc6wpd22w24），室外有唔少打卡點（圖: barbaours）
Arte M
地址：鰂魚涌英皇道728號K11 ATELIER2樓HACC
時間：即日起 11:00 - 19:00
門票：線上預訂
文: Cathy.H
