講起乳鴿、雞粥，好自然就會即刻諗起沙田、大圍。但最近，元朗都新開咗間小店，有脆香BB鴿同雞粥食。

呢間小店開咗個零月，店主Michael做咗十幾年中菜，舖頭食物款式暫時唔算好多，都係乳鴿、粥品同豉油皇炒麵。全部都只係做外賣，方便街坊買返屋企加餸做晚餐，或者宵夜。

乳鴿係BB鴿，Michael話細隻啲，啲肉嫩啲。一隻隻BB鴿先被浸過用多種香料熬製出嚟嘅滷水，然後再搽上用麥芽糖、白醋等調製嘅汁，最後再風乾3個鐘。到客人落單買嗰陣，再即刻炸一炸香佢。

住得近就有著數啦，啱啱炸起即刻食，熱辣辣，乳鴿皮仲係脆der，食得出絲絲麥芽糖嘅甜味，啲肉又真係幾嫩下，淡淡嘅滷水味慢慢滲出。每日限量90 – 130隻留意返，想食就唔好太夜去喇。

食乳鴿唔知點解係要配雞粥，呢度嘅雞粥煲得好綿，雞用酒同薑做過調味，又香又滑，令到成碗粥啖啖都滲透住濃郁嘅雞味。細心啲食嘅，仲可以食到一片片嘅腐竹。雞粥之外，都有生滾鯇魚腩粥、皮蛋滑牛粥、生菜鯪魚球粥、豬肚滑雞粥等選擇。

高哥一Cook
地址：元朗鳳攸南街9號好順利大廈1座地下1C&D號舖

文、相：Kar