天氣凍冰冰，梗係要食煲仔飯暖吓身！廟街小店係有風味，但如果要坐得舒服、食得放心，不妨去呢間新開嘅煲仔飯專門店！憶食尚集團喺5年前於國內開業，本身為臘味製造商，自家工場製作臘腸、臘肉及板鴨，並於網上售賣。
董事長Iris本身從事金融業，有見企業之間不時以臘味送禮，但又擔心食品安全，於是放棄高薪厚職，投身食品製造業，以批發形式製作臘味，供應給國內房地產、銀行等機構。佐敦餐廳為概念店，於深圳、安徽有3間分店，食物都是用自家產品製作，客人食過覺得好食，就可以喺零售店買走。
所有臘味都用靚料炮製，不加防腐劑及化學物，選用河源自家農場嘅走地新鮮土豬及重慶黑毛豬，臘腸選用背部脂肪及後腿瘦肉部位，三分肥七分瘦，臘肉就用肋排加五花腩兩個部位。南安板鴨用1.3公斤麻鴨，有肉地不會太瘦。
荷葉臘味蒸飯 $168
煲仔飯即叫即煲，由生煲成熟，米係東北五常大米，濕潤飽滿。放入臘味煲20分鐘左右，上枱加埋自家製古法瓦缸頭抽同葱花，臘味食到食材原味，最特別都係川味臘腸，食落帶煙燻香。食到最後飯焦，仲可以加入紅茶製成茶漬飯，伴湯食似脆米口感！
川味臘味煲仔飯 $148
其他招牌菜包括鮑魚XO醬拌面，係Iris媽媽秘方，用本地搜購嘅元貝、金華火腿、蝦米，食得出瑤柱絲，香辣惹味。手工空心掛麵係《舌尖上的中國》介紹過的張爺爺廠房製作，選用俄羅斯麵粉，人手拉成空心狀，質感似天使麵，微微煙韌彈牙。
鮑魚XO醬拌麵 $88
清蒸鮮醃海鯧來自南海水域，撈起立即冰鮮，只醃15至20 分鐘，鹹香保持鮮味，肉質嫩滑，好食過一般鹹魚。御髮膳似八寶粥，內有機黑米、花生、蕨麻等，此食療有生髮效果，加入糯米製成糖水食用。
清蒸鮮醃海鯧 $88
御髮膳粥 $58
以上所有食物都可以喺零售店買到，有齊製作方法，返到屋企唔怕唔識煮啦。餐廳佔地兩層，雖然價位唔平，不過食嘅都係靚貨，又坐得舒服，唔同食法啦。
地址：佐敦文匯街22-24號地下2-4號舖
文、相、片：Perrins