冬天終於正式開始，望住不停翻滾及冒煙嘅羊腩煲、加埋索晒汁嘅腐竹同生菜真係流晒口水，同朋友或家人圍住張枱食就最溫暖喇！今次開飯仔介紹八間羊腩煲餐廳畀大家，睇吓邊一間啱你心水就 Bookmark 喇～
滋味雙冬羊腩煲 金萬年酒家
位於黃埔天地嘅粵式點心食肆，推出一系列冬日暖身菜式，最推介嘅當然係雙冬羊腩煲！羊腩件間腍滑多汁，枝竹、冬菇等配料都非常入味，送飯一流。另外亦有麵醬鮮淮山南瓜排骨煲同健康素千層，以養生食材入饌，冬天必食。
性價比超高 強記小廚
圖: chloehahahaha
港式大排檔，呢間羊腩煲無論羊肉定支竹嘅份量都好多，價錢又公道，配料包括馬蹄、枝竹及生菜等，不過呢間啲羊肉炆得入味又無咩羊騷味，可能會比較適合食羊初階者。
奶白色湯底 鋒記小炒王
圖: 唔少人都專誠揸車去食嘅羊腩煲！鋒記嘅羊腩煲特別之處湯底呈奶白色，帶有陣陣魚肉鮮味，味道更有層次，盡顯誠意。 配料包括枝竹、冬菇及筍，冬菇入晒味令人驚喜。
50年老店 珠江酒家
圖: kent1012
主打港式小炒嘅街坊老店，已經有50年歷史招牌古法羊腩煲係人人必試嘅菜式。羊腩軟腍入味，帶有濃濃嘅羶香，鍾意食羊嘅朋友不可錯過。想再邪惡啲，最後記得加個公仔麵落去一齊食呀。
濃郁羊腩煲+自家製炸魚皮 標記樂園潮州粉麵菜館
圖: 餐廳Facebook
一間主打潮州菜嘅餐廳，今個冬天都有羊腩煲食！羊腩煲連皮帶骨，肉質都軟腍，羊羶味適中。另外記得叫埋自家製鮮炸魚皮，口感鬆脆，將香脆嘅魚皮浸落羊腩煲個汁食真係無得輸呀。
自家製醬汁 基隆茶餐廳
圖: alva cheng
可以外賣或堂食嘅羊腩煲，仲會送一份生菜。呢間特別在於會於羊腩煲內加入青蔥、馬蹄及自家製醬汁，惹味得嚟又可以減低羊羶味，同樣啱平時怕太羶味嘅朋友。
米芝蓮推介 增煇大排檔 & 增煇藝廚
圖: 米芝蓮推介嘅馳名小炒店，同樣唔少人都會慕名去試佢哋嘅羊腩煲。羊腩啖啖肉同好嫩滑，湯底濃稠適中，帶有酒香及甜味，配料有齊枝竹、冬菇及馬蹄，一煲夠晒4至5個人食！
炭爐羊腩煲 星小宴
圖: KaKa522
望住個沙灘景食羊腩煲係咩感覺？黃金海岸呢間粵菜一樣有羊腩煲食，而且仲要用炭爐，肉質偏腍身，入面嘅粉葛入味又爽脆，而且喺呢個咁有情調嘅氛圍下食羊腩煲真係別有一番風味。
文: Yanica