抹茶控注意！旺角呢間主打現代日本茶飲嘅Cafe日前喺同區重開啦，由地舖嘅外賣店變成開喺樓上有得坐低慢慢飲。招牌抹茶、焙茶系列當然係推介，用玻璃杯裝嘅抹茶拿鐵漸層靚到好似富士山咁！另外仲有咖啡、梳打、意粉、甜品等，選擇更多元化。
 

Cafe Hachiko最近喺旺角一座商業大廈重開，日頭係主打日本茶飲、咖啡嘅Cafe，夜晚就係供應威士忌、Cocktails嘅威士忌吧。不過餐廳暫時仲未攞到酒牌，想去飲杯威士忌嘅朋友要等等喇。
 

宇治抹茶紅豆拿鐵（$58）

熱賣No.1就係呢杯宇治抹茶紅豆拿鐵，底層係北海道十勝紅豆，加上明治4.3特濃牛奶、JAS（日本農業標準）有機認證抹茶，加埋奶泡再撒上抹茶粉，賣相同配搭都好吸引！抹茶係店員即點即沖，先過篩再用茶筅刷茶，所以特別濃厚甘甜，茶香突出。

餐廳仲有個推薦嘅品嘗次序：先用羮𢳂起紅豆同奶泡嚟食，品嘗到軟綿香甜嘅味道同口感，再連埋抹茶一齊飲，令層次更豐富。

日本焙茶拿鐵（$50）

焙茶飲品亦係推介，同樣有JAS有機認證，比抹茶少一份清新但多一重焙煎香氣。記得搞勻飲用，因為茶湯偏濃同甘，加埋牛奶嘅甜味就易入口得多。茶飲另外仲可以揀芝士奶蓋、冰樂，甚至有之前大熱嘅400次系列選擇。
 

焦糖布丁咖啡拿鐵（$48）

Espresso用嘅係請本地炒豆師烘焙嘅House Blend，糅合四款唔同咖啡豆，令咖啡味道有更多層次。而呢杯焦糖布丁咖啡拿鐵更加會喺Latte嘅奶泡上面灑上黃糖，再用火槍燒出焦糖脆面！建議揀焦糖脆面撈埋咖啡嚟飲，帶焦香嘅甜味同Nutty嘅咖啡好夾。唔想飲咁甜就可以試下竹炭咖啡拿鐵（$45）。
 

 

喫茶杯波隆那肉醬意粉（$88）

樓上店唔單止有得坐仲有得食，選擇以西式為主。喫茶杯波隆那肉醬意粉係經典嘅蕃茄肉醬意粉，肉味同蕃茄鮮香平衡，配搭芝士碎就更濃郁香口。
 

草莓法式西多士（$88）

法式西多士分量十足，細食嘅話真係要搵個朋友Share。多士邊緣煙韌裡面柔軟濕潤，肉桂香氣突出，但略嫌有少少蓋過雞蛋香。加埋牛油同糖漿一齊食味道就更豐富。新鮮士多啤梨同藍莓嘅酸平衡返多士嘅甜，整體唔會太膩。
 

Cafe Hachiko
地址：旺角彌敦道575號Ladder Dundas 8樓

文、相：Cathy