無論係舊式定新派，港式車仔麵相信大家都一定有食過。咁台式車仔麵又點睇呢？呢間台式養生火鍋店開新Line，賣台式車仔麵，用自家熬製招牌美人湯底，搭配台灣直送嘅各款配料同麵底，係幾有新鮮感嘅。
 

養心麵係養心殿台式養生鍋嘅姐妹店，皆因火鍋店唔少選用嘅配料都從台灣空運到港，老闆索性再開一間車仔麵，令台式配料有更多可能性！配搭同點單方式同港式車仔麵差唔多，有麵底、醬汁同湯底選擇，而配料數量無任何限制，鍾意加幾多款都得。
 

美人湯底車仔麵（台灣關廟麵$18、台灣水蓮$10、台式滷水糖心蛋$10、台式滷水牛展$12、台南蚵仔$18）

湯底有兩款選擇，第一款係品牌相當出名嘅美人湯，同火鍋店出品一樣，用烏雞、桃膠、金華火腿、杞子、南棗長時間熬製。而且點美人湯底嘅話，每碗麵都會免費附上桃膠一份！咬落仲有淡淡藥材香。而台灣關廟麵由台灣飛機直送，口感滑溜而且都幾掛湯，最抵讃嘅係浸得耐都唔會變得過腍。
 

配料有唔少台式同港式選擇，綠色長條形嘅係水蓮，係一種水生植物嘅葉柄，口感清甜爽脆。糖心蛋嘅流心效果唔錯，亦帶滷水香。牛展亦相當入味，厚切有咬口，不過口感如果可以帶多少少Q彈就更好喇。蚵仔落得幾爽手，不過就無乜味道。
 

麻辣湯底車仔麵（台式寬粉條$18、台式麻辣鴨血$10、台式滷水金錢肚$12、千層冰豆腐$12、蒜椒雞翼尖$12）

麻辣湯底係用美人湯再加自家製麻辣醬，同台式麻辣湯底一樣屬於比較少油，麻、辣兼具但又唔會太嗆，可以成碗飲都唔覺得口渴。想再辣啲嘅話可以加麻辣醬或者咖喱醬。相反想少辣嘅話，記得落單嘅時候講低啦。台式寬粉條吸哂麻辣湯底，加上口感彈牙，非常討喜。
 

麻辣鴨血相當入味，外滑內嫩。加埋索湯嘅千層冰豆腐，真係好似食緊台灣麻辣鍋！台式滷水金錢肚口感爽彈，蒜椒雞翼尖嘅蒜香非常吸引，口感略嫌過腍。
 

 

台式滷豬腳（$28）

大腸麵線（$28）

除咗車仔麵，餐廳仲有多款台式小食、台式特色飯同特飲選擇。例如台式滷豬腳、蚵仔麵線、台灣牛肉麵、台式肉燥飯等等。同幾個朋友一齊嚟食就可以一人一碗麵再Share小食啦。
 

新店開張大概一個月，Lunch Time經常爆滿。其實餐廳開到凌晨三點，食車仔麵當宵夜一樣得。餐廳亦有安裝自助落單機，不過暫時未用得，落單都係搵返店員幫手先啦。
 

養心麵
銅鑼灣軒尼詩道365號地舖

文、相：Cathy