由即日起，火鍋連鎖店牛涮鍋將首次推出「蒸籠」料理，以高溫蒸熟籠內嘅肉類、海鮮及蔬菜，夠晒原汁原味！咁有gimmick，梗係要詳細逐樣睇啦！

首度登場！免費追享蒸籠料理

利用高溫將食物蒸熟，亦令蒸籠嘅木香滲到食物之中，既可保留食物最原汁原味嘅味道，食落亦健康啲少油啲！凡惠顧美國特上牛小排或以上嘅90分鐘放題就可以免費享用到架喇，唔使加錢都食到，正！

蒸籠料理點玩嘅呢？唔使擔心，枱上附設蒸籠教學，在場店員亦會幫手架！

一上枱就見到木蒸籠，入面有金菇、生菜、娃娃菜等野菜。

只要等蒸籠冒出蒸氣，就可以放入心水配料，記得食物需平放，不可重疊，唔係嘅話就有機會唔熟架！如果蒸嘅係牛肉，不妨可灑上少許黑椒粉提味。

然後望住枱上嘅沙漏，等待3-5分鐘就可以揭蓋架喇！

薄薄牛肉經蒸煮過後，都已經夠熟，如果仲未熟不妨蒸多陣。

食之前可將野菜放喺牛肉上面，然後一同夾起嚟食，口感會juicy啲架！

想滋味啲嘅話，指南上仲教你配搭不同醬汁，好似肉類就沾胡麻醬、野菜就沾蔥花、蘿蔔蓉、柚子醋等。

如果你柯打咗日本極上黑毛和牛放題，仲可以食到海鮮盛合，有蠔、蝦、魷魚及帆立貝可以蒸。

嫌唔夠喉？可免費追加野菜，蒸煮需時3分鐘左右。或者可叫店員收起蒸籠，shabu shabu就可以開動啦！

價錢：

美國特上牛小排放題

成人$188/位、11歲或以下小童/65歲或以上長者$128/位

澳洲和牛放題

成人$258/位、11歲或以下小童/65歲或以上長者$188/位

日本極上黑毛和牛放題

成人$318/位、11歲或以下小童/65歲或以上長者$208/位

牛涮鍋
地址：銅鑼灣告士打道280號世貿中心3樓309-310號舖

文：Joy