香噴噴嘅串燒係唔少人嘅宵夜首選，如果你鍾意食豬肉同豬內臟嘅話，咁銅鑼灣呢間新開嘅日式串燒店更加係必試！唔單止引入日本岩手縣嘅白金豚，仲有本地新鮮豬內臟，由比較常見嘅豬肝、豬大腸，到少見嘅豬心，甚至豬腦都有！
 

Moku Moku Yakiton呢間居酒屋座落銅鑼灣，主打日式豚肉串燒，單係串燒選擇就多達55款！餐廳背後有日籍料理達人Kei San監修，加上入行超過20年經驗豐富嘅串燒大廚朱少豐坐陣，出品質素自然有保證啦。
 

豬肝慕斯（$68）

小酌前先嚟碟小食，豬肝慕斯顧名思義先洗乾淨新鮮生豬肝，焗熟後加入忌廉等材料搞勻，放涼切粒成Creamy香口嘅慕斯。配埋Cream Cheese、蕃茄同梳打餅一齊食，鹹香有致最啱送酒。
 

（左至右）豬皮串（$28）、豬頭肉串（$28）、豬喉軟骨串（$34）、豬耳芝士串（$32）、豬腩脂串 （$28）、上等豬脷串（$38）

叫得豚肉串燒專門店，自然有唔同部位畀大家揀啦。呢六款係大廚推介，豬皮串先滷後燒，食之前再點少少黃豆粉食最香口。豬頭肉即係臉頰肉，口感柔嫩有啲似牛肉。豬喉軟骨串平時好少見，皆因一隻豬只夠整兩串！上等豬脷亦爽口多汁。
 

（左至右）豬腰子（$28）、豬生腸串（$34）、豬心串（$28）、豬小腸串（$34）、豬肝串（$28）、豬大腸串（$34）

想食得再刁鑽啲，必試豬內臟！餐廳選用本地新鮮即日貨，唔會留過夜，唔需要醃漂處理都唔會有臊味，自然啖啖原汁原味啦。豬腰子即係豬腎，滑中帶爽。豬肝口感粉嫩，調味亦啱啱好，食得出師傅功架。
 

（左至右）白金豚肉林檎紅薑卷（$34）、白金豚肉韭菜泡菜卷（$34）、白金豚肉茗荷卷（$34）、白金豚肉蒜芯卷（$32）

餐廳亦特別引入嚟自日本岩手縣嘅白金豚，特色係豬隻飲用山上嘅湧泉水，豚肉肉質鮮嫩，選用五花腩部位做卷燒，更突顯甘香。最推薦白金豚肉林檎紅薑卷，以白金豚肉包住蘋果肉，燒好後再加紅薑汁同蛋黃醬，食落富紅薑香，而有少少脆邊嘅豚肉同香甜多汁嘅蘋果一齊食，香口得嚟感覺清爽唔油膩。
 

網油豬腦卷（$38）

重口味之選！處理豬腦步驟相當複雜，呢度嘅師傅就先用清酒煮熟豬腦，之後再以豬網油包嚟燒，口感軟嫩似豆腐。配以燒汁醬、炸蒜片、櫻花蝦等，相當惹味。
 

 

（左至右）魚餅（$28）、沖繩豬手（$38）、蘿蔔（$18）

串燒以外亦有唔少選擇，好似味噌煮沖繩名物豬手，食落非常軟腍入味。魚餅亦富味噌香，同時無蓋過魚味。皆因師傅特別先用日式高湯將食材煮至八九成熟，再加入兩款唔同味噌調味，香濃而唔死鹹。
 

一藏豚骨湯拉麵（$68）

喺居酒屋最後想食返碗飽肚嘅飯麵？呢度有豚骨湯拉麵同沾麵選擇，前者湯底用新鮮豬骨等材料熬足12個鐘，特別香濃。後者係魚介豚骨沾汁，再加入鮮蝦同櫻花蝦粉，充滿蝦香。
 

（左至右）咖啡燒酎、自家製梅酒、荔枝酒、菠蘿檸檬酒（各$68）、八千代伝梅酒（二年釀）（$298）（限量供應）

食串燒當然要配返杯酒啦，呢度就有供應Kei San監製嘅自家釀燒酎。梅酒、菠蘿檸檬酒等水果酒相對會比較易入口，而咖啡燒酎就係將咖啡豆深層烘培後再以燒酎浸泡，同時富咖啡香同酒香。八千代伝梅酒更以鹿兒島得獎八千代伝燒酎，加全熟嘅日本紀州南高梅釀製兩年，醇厚甘甜。
 

Moku Moku Yakiton
銅鑼灣軒尼詩道499號永光商業大廈7樓

文、相、片：Cathy