日式湯咖喱比起一般咖喱較輕盈、易入口，之前喺香港呢選擇就唔太多，咁啱今年就有兩間主打北海道湯咖哩嘅餐廳開業，一於介紹晒畀大家！

目錄

全新過江龍 Suage北海道湯咖哩

圖: francisg712345

嚟自日本嘅過江龍北海道湯咖哩！餐廳選址旺角，佔地 1,000 呎，佢哋湯咖哩嘅湯底採用日本自家農場種植嘅蔬菜熬煮 12 小時而成，包括番茄、洋蔥及秘製咖喱香料，味道香濃之餘仲好清甜，難怪被稱為日本 No.1～主菜方面都有好多選擇，例如和牛肩胛湯咖喱，和牛大大塊好香牛味，肉質都好軟腍；脆嫩雞髀湯咖喱一樣咁出色，真係髀如其名又脆又嫩。更有香港限定嘅龍蝦海鮮盛湯咖喱，龍蝦嘅鮮味滲埋入湯度，配埋帶子、青口及墨魚仔，鮮甜味更上一層樓。另外好貼心嘅係辣度由唔辣到無語辣都有，而且知道香港人鍾意麵食，特意增設配拉麵及烏冬等選項。

日籍老闆主理小店 Asiri  

圖: evelynyeungyl

一間喺鰂魚涌已經屹立多年嘅湯咖喱小店，係區內人氣小店。餐廳由日本籍老闆加藤茂伸先生主理，堅持選用嚟自北海道嘅食材，例如北海道嘅夢美人米同芝士等，好有日式家庭嘅味道。佢哋嘅湯咖喱帶有鰹魚同昆布嘅甘甜味及蔬菜嘅清甜味，微微帶酸、味道清新食得好舒服。配料有雜菜、牛舌、蝦、雞腿、豚肉或炸魚柳，幾推介雞腿，炆得好軟腍又入味。配菜顏色繽紛鮮艷，有茄子、南瓜、甘筍及西蘭花，營養均衡健康又好味。

飛驒和牛漢堡扒湯咖哩 森．湯咖哩   

圖: Blue-

呢間日式湯咖喱專門店都係今年先開業，湯咖喱同樣用大量蔬菜熬製而成，唔會過份濃郁，味道恰到好處，辛香四溢，集鹹、鮮、甘、辣於一身，層次豐富送飯一流。佢哋嘅所有配料都好有誠意，例如飛驒和牛漢堡扒，外層煎到香一香，然後充滿肉汁同牛味，仲有好濃嘅牛脂香，推薦！唔食牛嘅朋友都可以食慢煮炙燒雞叉燒，肥瘦適中、肉質嫩滑有厚度。所有湯咖喱都會配上 10 款炸過嘅時令蔬菜，例如薯仔、西蘭花、秋葵及南瓜等，索晒咖喱湯好正呀～

文: Yanica