而家都仲係廿零度，仲係可以食雪糕嘅天氣！講到雪糕，一定唔少得義式雪糕Gelato。Gelato雪糕忌廉用量較一般雪糕低，牛奶佔比較高，所以口感較為creamy同綿密，今期介紹4間Gelato專門店畀大家，一定滿足到甜品控個胃。

香港製造 Fruttato gelato

香港本土自家品牌嘅手工雪糕，口感香濃軟滑，有8種唔同口味，包括曲奇、芝麻、豆腐、薑味、抺茶、椰子、D24榴槤及火麻仁。特別推介豆腐同D24榴槤，豆腐味香濃，甜味自然，啱晒唔好甜嘅朋友。D24榴槤就當然為咁多位榴槤控而設啦，濃到好似食緊榴槤咁！

圖: Kclhil

百分百手工製作 Dood Bottega Gelateria

一見到呢度雪糕嘅價錢可能你會嚇一跳，但其實食完你就明點解值呢個價啦～Gelato真係由零開始喺店舖製作，亦購入價值連城嘅雪糕機製成，質感實在得嚟好軟滑。店舖內款款口味都係誠意之作，如升級版開心果口味，選用意大利西西里島開心果，味道真係極濃郁。金芝麻都好出色，同樣濃郁到好似食緊芝麻糊咁。另外仲有季節限定嘅水果口味，全部都係用最時令嘅水果製成，果香好突出！

圖: tiffsuet

澳洲過江龍 Messina

來自澳洲嘅人氣雪糕店，選用新鮮採集嘅澤西牛奶，雪糕好香滑，亦於澳洲自設農場種植榛子及士多啤梨，確保所有原材料品質都有保證。店內常設35款經典口味，如波森莓、椰子荔枝同朱古力花生醬等。仲有幾款香港限定口味，如蛋撻、凍檸茶、黑芝麻湯圓、港式西多士等，蛋撻嗰款奶味幾突出，同埋有蛋香，中間仲有啲酥皮；黑芝麻湯圓除咗香濃，仲真係有湯圓皮，都幾像真。

圖: ctyfoodiary

招牌濃郁開心果口味 Gelato-go

一樣係過江龍Gelato店，呢間就嚟自美國，每日使用新鮮材料製造，而且乳脂肪含量更加係低過8%，食完一啲都唔邪惡～每日輪流供應約20款口味嘅gelato，開心果都係招牌，一樣咁香濃～另外朱古力愛好者一定要試香濃朱古力口味，又香又滑，朱古力味濃又唔過甜；Mascarpone Wild Berries都值得一試，第一啖有好香雲呢拿味，之後有啖啖莓香，又幾清新。

圖: dr.foodrecord

文：Yanica