乳豬都係其中一款經典燒味，無論喺高級酒樓定平民啲嘅燒臘店都好易搵到佢嘅蹤影，今次一次過介紹晒畀大家！

目錄

人手高溫烤製 新合成燒臘飯店

價廉物美嘅傳統港式燒味，最近由三位 90 後嘅年輕老闆接捧～招牌係每日限量即叫即燒嘅人手烤製乳豬，將秘製調味醬料塗抹均勻於乳豬上，然後風乾醃製至少 8 個小時，隨後用太空爐以人手高溫烤製，過程極考功夫，需要時不時轉動乳豬以保持燒得均勻。乳豬外層香脆且肉質嫩滑，一用刀斬就會聽到切豬皮嘅鬆脆聲，每日中午 12 點準時出爐，由於製作需時，每日限量兩至三隻咋！

香噴噴炭燒乳豬 喜萬年酒樓

圖: Mr Eat

呢間酒樓嘅金牌炭燒乳豬好出名㗎，堅持唔會賣隔夜豬，嚴選 6 至 7 斤嘅乳豬，而且會揀脂肪無咁多嘅，咁用炭爐燒出嚟嘅時候就會皮脆肉嫩。乳豬一上枱外皮金黃，一入口果然炭香味十足，名不虛傳，外皮薄薄一層好香脆，油脂唔多，點埋乳豬醬同砂糖，鹹鹹甜甜又酥香。

米芝蓮抵食之選 新園興記燒臘飯店

圖: KarenSiu6719、Whisky Pow

已經獲得米芝蓮推介好多年嘅燒味店，一隻又一隻新鮮燒起嘅乳豬掛喺櫥窗上，燒到起麻皮一睇就知好食。豬皮燒到好脆又薄，豬嘅油脂喺口中慢慢溶化，本身豬肉已帶微微鹹香，點少少脆豬醬更有畫龍點睛效果。

黑松露薏米燒釀乳豬 天寶閣 

圖: 美食焚化爐

黑松露薏米燒釀乳豬係呢間酒店餐廳招牌，原隻乳豬皮肉比例均稱，分多次燒炙後芝麻皮香脆又有嚼口。中間釀入黑松露、糯米、薏米、鴨肝、燒鴨粒、火腿及蓮子，每一啖餡料都滲有乳豬嘅油香同埋滿滿黑松露香氣，令人印象深刻！

鐵鍋酸菜焗原隻乳豬伴松茸五常大米 唐人館 

乳豬都可以有創新食法，好似呢道鐵鍋酸菜焗原隻乳豬伴松茸五常大米，原隻乳豬以海鹽醃製同吹乾後，以滾油炸至表皮香脆內軟，再加入酸菜同濃湯一齊焗，酸菜可以中和乳豬嘅膩感。上菜時以松茸配上東北五常大米，呢個食法好有驚喜。

文: Yanica