香港有唔少夜鬼，都有個共通嘅問題，就係：為何深宵總是餓？然後就引申另一個問題，夜麻麻去邊度搵食？唔通次次都淥個杯麵咩？唔使煩，各區都有唔少深夜食堂，開飯仔同你哋逐區去食宵夜！喺尖沙咀就算幾夜都一樣可以食到多國美食啦，絕對係夜鬼嘅覓食天堂呀！
非傳統居酒屋 喜膳燒 
圖﹕iameatproduct、_eatateeaten_hk_
講到食宵就一定會有串燒，呢間串燒店就有啲居酒屋feel，氣氛自在，啱晒同friends傾心事 ~提供勁多串燒選擇，以日式為主，但同時亦有泰式原隻燒魷魚、台式香腸等。特別介紹燒雞泡魚乾，燒得啱啱好，唔太韌，炭燒香中又帶啲甜味~
營業時間﹕12:00-15:00；18:00-02:00
深夜撐枱腳 Cosmos Restaurant & Bar
圖﹕想深夜嚟個甜蜜約會，有情調、有西餐、凌晨3點仲開，呢個餐廳就可以一次過滿足晒你三個願望啦！餐廳提供各式意粉、扒類等，而招牌菜之一「慢煮脆皮咸豬手」，相當有份量，兩個人share就啱晒啦！慢煮得嚟仲可以做到脆皮嘅效果，皮脆肉嫩，相當考功夫呀！
營業時間﹕11:30-03:00
韓國過江龍 Outdark
圖﹕嚟自韓國嘅過江龍，主打一系列韓國料理，芝士炸雞、DIY飯糰、魚糕湯都有！但嚟到又點可能唔食「芝士豬肋骨鍋」呢？各式食材整齊放喺鐵鍋上，豬肋骨勁有韓式BBQ烤肉醬味，再配上水牛車打芝士嘅甜味，甜甜辣辣！
營業時間﹕17:00-02:00
正宗墨西哥菜 8Five2 Restobar
圖﹕想有啲新鮮感，咁不妨試下墨西哥菜啦！餐廳採用酒吧設計，裝修夠晒格調。食材嚟自墨西哥！夜麻麻吹水就最啱食個墨西哥脆玉米片啦，可以揀雞肉、金明蝦、牛肉等配料。嗌多杯mocktail，真係可以有排傾呀！
營業時間﹕12:00-02:00
雞翼配cocktail ND42 Bar & Lounge
圖﹕cwswincy
呢間bar提供各式輕食同唔同類型嘅cocktail，加埋勁有情調嘅環境，完全係理想gathering嘅地方。佢哋嘅手拉意大利Pizza，選用優質意大利麵粉製造。自認係雞翼控嘅話，就必試呢度嘅特製雞翼啦！雞翼配合返客人飲酒時想食嘅味道，有椒鹽、水牛、蜂蜜大蒜等六種口味，絕對係一流嘅佐酒小食！
營業時間﹕15:00-02:00
文：Kiko
