灣仔最近新開一間滬菜館，主打傳統上海風味菜及多款手工點心，同區來說價錢夠貼地。餐廳仲有點心名廚陳彥師傅坐陣，陳彥師傅師承點心皇后葛賢萼，九十年代入行，至今已經二十七年入廚經驗，對京、川、滬菜式同各派麵點製作都好熟悉！雖然係上海菜館，但裝修融合傳統及現代風格，牆上掛滿LED 點心圖案，食上海菜之餘仲可以「相機食先」。
店內所有點心都係即場手工包製，然後即叫即蒸。招牌灌湯牛肉餡餅，餅皮用熟面製成，煎嘅時候無咁容易漏汁，熱辣辣嘅牛肉餡餅，外皮酥脆，一咬落去牛肉汁爆發，充滿肉香亦鮮甜。
講到上海菜當然唔少得小籠包，招牌小籠包選用新鮮前赤肉包製，配上豬骨湯並加入紅頭蔥，麵皮厚薄適中，肉汁飽滿。而老上海珍珠燒賣係上海點心中嘅傳統之作，將糯米餡料包喺麵皮內， 軟糯有咬口。
小菜方面，有近年喺香港好受歡迎嘅酸菜魚，不過餐廳就改用龍躉片。酸菜龍躉片以龍躉骨熬煮高湯，魚肉嫩滑啖啖肉，唔會太辣好惹味。
更多【新店直擊】： |
黃金蝦球鹹蛋味恰到好處，唔會太膩，蝦肉都爽口彈牙。
餐廳亦有供應養生甜品，桃膠伴鮮牛奶燉花膠用3.6 牛乳燉桃膠及花膠，奶味香濃又足料。
成日有兩聲咳嘅朋友，可以試吓呢個滋補潤喉羹，熱食加咗鴨梨、杞子及胖大海等；而冷食就加入柚子末、薄荷及胖大海，好潤喉！
地址: 灣仔軒尼詩道385-391號軒寧大廈地下1-2號舖
文、相、片: Yanica