OpenRice有3大排行榜，為大家捕捉時下最吸引大家嘅餐廳，成為潮食達人，即睇今個月「最多收藏」、「最高瀏覽」同「本月熱門」嘅No.1係邊間啦！

最多收藏 - 韓廚手工意粉 PECORINO

圖：ki918

唔知道係韓廚掘起，定係大家熱愛手工pizza同意粉，呢間開業冇耐嘅文青風意大利餐廳，成為10月最多用戶收藏之選。不過店內嘅半開放式廚房設計，讓大家可以睇住Oppa搓新鮮麵糰，的確係賣點之一。其中包成三角形嘅Ricotta Ravioli，每粒都加入ricotta cheese；而Truffle White Ragu入口creamy，松露味唔算好強勁，平時少食松露菜式嘅朋友都可以一試。

最高瀏覽 - 熱話南韓米芝蓮廚師 Mosu Hong Kong

圖：Nei bb

韓國實境比賽節目《黑白大廚：料理階級大戰》熱潮之下，評審之一、南韓唯一米芝蓮三星主廚安成宰嘅香港餐廳當然備受關注。香港店雖然未摘星，但安廚不時來港監督，確保出品水準。嚟到邊試節目中出現過嘅餐廳招牌菜「橡果麵配黑松露」，師傅將韓國傳統橡果麵裹上醇厚嘅香芹牛油醬，入口大草本同奶油香氣；加上鋪滿表面嘅新鮮刨製黑松露片，香氣迫人。提提大家，嚟緊11月30至12月1日，新加坡米芝蓮三星餐廳主廚會來港聯乘安廚推出限定餐單，想試就要留意喇。

本月熱門 - 日本壽司刺身店 鮨燐

圖：琉璃

不時推出限定餐目嘅日式席前料理店，以時令食材製作特色壽司、刺身作招徠，例如大葉梅子秋刀魚天婦羅、配清酒嘅「wine pairing」等等，有新鮮感又不失傳統風味。餐廳只有十幾個座位，師傅可以更專注製作料理畀客人，嚟慶祝重要日子或約會都唔錯。

文：Cathy