終於嚟到 2017年最後一個月嘅十強喇，總結今年真係有好多唔同類型嘅餐廳上過榜，百花齊放對係香港飲食界嘅好事嚟嘅！講返12月嘅走勢先，有餐廳都回勇重返十強榜喎，亦有今年流行嘅食品上位。唔講咁多即睇結果！
第10位 2DP
呢間素食餐廳連續三個月上榜，位於尖沙咀最多嘢食嘅厚福街，而且集合年輕人鍾意嘅素食、西餐同甜品幾款當紅元素，難怪一直人氣高企！就算天氣凍都仍然有人食茶味雪糕、刨冰，好似加咗食用花嘅秘密花園，賣相靚，係店內招牌菜之一。
圖：第9位 有囍
火鍋食得多，肉骨茶湯底又試過未？呢間星馬菜館繼續上榜，除咗有特色火鍋湯底，今次推介吓小菜啦，大廚曾經憑海南雞獲米芝蓮推介，雞肉慢慢浸熟，嫩滑有油香，雞皮又爽滑，其他推介包括堂弄火焰胡椒蟹同麥皮虎蝦等。
圖：第8位 餃子縣餃子專門店 (*新上榜)
餃子喺今年算係長開長hit，今次呢一間位於旺角，已經有好幾間分店。餃子樂園有8隻唔同口味水餃，包括椰菜木耳豬肉、韭菜豬肉、香菇粟米雞肉、素餃等，亦可以揀重慶酸辣湯或蕃茄湯底。新派口味就有芝士系列或者冰花煎餃，係平靚正之選！
圖：第7位 和氣食堂 (*新上榜)
好多人都話黃大仙係美食沙漠，但上年都多咗新餐廳進駐呀，好似呢間日式居酒屋，食物質素唔錯而且選擇豐富，芝士厚燒玉子、廣島蠔寄世鍋、燒三文魚皮同千回火鳥都好受歡迎，仲有大熱嘅海鮮丼同黑豚肩燒丼。難得價錢親民抵食，好多街坊客捧場。
圖：第6位 羲和雅苑 (*新上榜)
年尾突然有多間北京烤鴨店輪流開業，呢一間真係來自北京嘅名店！用當地烤鴨，即席片成鴨皮、鴨胸同鴨髀，配上爆炸糖、藍莓醬同哈蜜瓜，更自稱「跳舞的烤鴨」夠晒破格！餐廳開喺海港城最靚海景位，價位唔平，不過仍然有唔少人慕名幫襯。
圖：apuruw
第5位 FLIPPER’S
今年其中一間最矚目嘅過江龍，憑「奇蹟之班戟」令一眾食客甘心排隊都要食！雖然熱潮稍過，但不時推出期間限定口味及鹹食，所以今次再度上榜都唔驚訝。鹹班戟有牛油果三文魚、粟米牛油果及煙肉煎蛋，可以揀全麥或熱香餅，甜點就可以揀適合冬日食嘅南瓜焦糖。
圖：第4位 金記冰室 (*新上榜)
金記冰室喺筲箕灣自1967年開業，2013年易手後以懷舊冰室姿態開枝散葉，食物有傳統茶記嘅常餐、乾炒牛河、焗豬扒飯同鐵板什扒等，亦有新派嘅煎烏冬、鮮蝦忌廉藜麥炒意粉，價錢都算貼地嘅。開喺人流極多嘅商場入面，想食就梗係少不免要排隊啦。
圖：第3位 越滿 (*新上榜)
今年東南亞菜慢慢回勇，呢一間新開無耐嘅越南菜館走親民路線，感覺年輕又夠潮。食物就大路啲，小食有牛油雞翼、軟殼蟹米紙卷等，比較特色嘅有和牛舌湯河同海防蕃茄大頭蝦蟹肉湯河，價錢唔貴兼冇加一係抵食嘅！
圖：第2位 青花
繼續係旺角嘅東南亞菜！青花已經係第二次上榜，難得旺角有間坐得舒服嘅餐廳，梗係多人捧場啦！食物環境都走小清新路線，食嘢同打卡都一流，必吃菜式有生蝦刺身、芒果蟹肉沙律配柑桔汁、原隻龍蝦冬蔭芝士燴飯等。相信新年前後多人去旺角行街買波鞋，人氣繼續高企。
圖：第1位 火水爐冰室火鍋 (*新上榜)
2017年最後冠軍寶座係你喇！雖然今年未算好凍，但火鍋始終係冬天必吃之選，呢一間仲有懷舊戲院裝修，加上好受歡迎嘅冰室食品，潮人實鍾意呀。食物貴精不貴多，湯底有招牌特濃沙嗲、蕃茄海鮮蟹鍋等6款，除咗部份配料之外，一個價任食30幾款配料，訂座仲送鮑魚雞煲添！
圖：文：Perrins
