雞翼控注意！中環新開咗一間雞翼專門店，由雞翼達人Jack同拍擋Elliot開設，佢地話當初有呢個諗頭係因為覺得香港食雞翼選擇唔多，就算有都係偏向本地口味，所以就決定開一間可以迎合唔同人口味嘅雞翼專門店。

雞翼先放入八種醃料醃過夜，然後放入暖水中慢煮一小時，等到狀態半生半熟嘅情況下拎去炸，咁樣先做到皮脆多汁！

雞翼炸完後先再作調味，味道包括黑芝麻蜂蜜海鮮、黑椒檸檬、泰式甜辣醬、田園風味、咖啡香味、新加坡辣蟹味、燒烤味、死神醬、加州風味、紐奧良香粉同水牛城醬～總有一款啱口味！

黃金雞翼就係傳統嘅大蒜迷迭香口味，上台後先會灑上食用金箔粉，最啱用嚟打返個卡。

黑芝麻蜂蜜海鮮味嘅靈感來自北京填鴨，味道偏甜。

新加坡辣蟹味味道就唔太辣，鹹鹹香香好惹味。

死神醬口味加入咗一款由美國引入嘅辣醬，味道都幾辣，適合嚐辣者去試。

咖啡香味嘅做法加入少少expresso同朱古力，先苦後甘，亦唔會搶咗雞味。

多人一齊食的話可以叫個sharing platters，可以自選雞翼味道同配菜，配菜的話推薦炸蓮藕片，蓮藕片薄身好香脆，食到停唔到口！想健康啲的話可以揀牛油果～餐廳亦有Lunch set供應，可自選兩款口味雞翼、湯及配菜。

唔想淨係食雞翼咁dry，可以試試呢個手撕雞翼越式蒸包，用上雞翼嘅肉，特別嫩滑，加上醃製過嘅紅羅白及青瓜，仲有特製醬汁，味道好豐富！

餐廳喺星期六、日會有雞翼放題，$350可以任食各款雞翼同埋配菜，而星期三就會推出$5一隻雞翼優惠，雞翼控係咪流晒口水啦？

Wingman   

地址: 中環閣麟街37-43號祥興商業大廈6樓

文、相、片: Yanica