日本Sukiyaすき家日本直營店登陸旺角！所有食材同秘傳醬汁都由日本直送㗎，仲係24小時營業，方便大家隨時想食就食。品牌主打牛丼、烤雞同壽喜燒，仲有香港限定嘅豪華雙拼丼系列，啱晒各位心大心細咩都想食嘅朋友。
 

SUKIYA すき家係日本三大牛丼連鎖店之一，1982年創立，喺全球有超過2,500間分店。香港店由日本直營，招牌牛丼選用日本產100％越光米同100%美國牛肉，而且有齊細碗同加大碗唔同分量選擇，最平$25就食到！
 

牛丼（S$25、M$29、L$39、LL$45）

相信大家對牛丼都唔陌生啦，即係用醬油、白糖等調味料燉煮牛肉片同洋蔥，再淋喺白飯上面嘅牛肉飯。採用100%美國進口牛肉，自家工場將牛肉切成厚度適中嘅肥牛片。米亦係100%日本產越光米，精米後一星期內煮成白飯。
 

知道大家一定想問：有無得加牛汁？答案係有得免費加嘅！本身牛丼嘅牛肉都夠香夠軟，不過有多啲牛肉汁撈飯食感覺會再開心啲，嘻嘻。
 

香蔥溫泉蛋牛丼（M$38、L$48、LL$54）（炸雞套餐+$20）

唔少人去到日本必食嘅香蔥溫泉蛋牛丼，蔥花夠多鋪滿成碗飯，亮點溫泉蛋採用日本產雞蛋，半熟蛋黃撈埋一齊食香上加香啊！
  

燒肉丼（M$39、L$42、LL$69）

同樣用100%美國牛肉、越光米、日本直送醬汁，分別在於燒肉會煎過，多一重微焦香味。
 

牛肉烤雞雙拼丼（M$63、L$66）

豪華雙拼丼係香港限定，呢碗係牛肉加烤雞。因為烤雞有醬油所以會比牛肉濃味一啲。
 

 

烤雞丼（M$45、L$48、LL$84）（沙律套餐+$10）

烤雞選用鮮嫩雞肉，配以自家製甜味醬油。雞肉口感嫩滑，醬汁香甜的確好啱撈飯。
 

牛肉咖喱（S$44、M$48、L$58）

炸雞咖喱（S$49、M$53、L$63）

以咖喱慢煮大塊鮮味紅蘿蔔，日式咖喱香味濃郁，辣度適中。炸雞外脆內滑。
 

牛肉元氣早餐（$29）

日本人氣No.1早餐，建議食法係先將秋葵撈埋溫泉蛋，淋喺白飯上面再加幾滴豉油。
 

丼飯分量分為S、M、L、LL，M係標準分量

（左）布甸牛奶士多啤梨特飲（$29），（右）珍珠宇治牛奶抹茶（$32）

SUKIYA すき家
地址：旺角亞皆老街31號地舖

文、相：Cathy