又夠鐘數榜喇。3月十強既有係款式吸引又方便嘅外賣小店，亦有裝修別緻嘅打卡café，希望喺嚟緊呢個月，晚巿真係開得返嘅時候，飲食業可以繼續百花齊放，大家都可以有更多嘅美食選擇啦。
第10位 Cookie Vission（*新上榜）
圖：位於大坑嘅人氣曲奇餅店，款式多多，而且更有啲係舖頭自創，出面買唔到嘅。好似外酥內軟嘅pookie咁就多咗層焦糖酥皮，仲日日有唔同口味添。另外推介Matcha mochi brioche，微脆嘅菠蘿包皮，入面夾住麻糬同埋流心埋抹茶醬，香濃回甘。
第9位 瘋狂小面（*新上榜） 
圖：主打重慶小麵嘅川菜店，沸騰牛肉係其中一款人氣菜式，連埋大白菜、金菇、土豆片等多款配料一齊滾下滾下，以新鮮辣椒紅油再加乾辣椒、花椒粒等製作汁底，辣度夠晒刺激，牛肉同配料索晒汁入晒味，直達噴火級數，吸引唔少嗜辣朋友。而且就算冇晚巿堂食，都可以外賣返屋企，配埋加熱器同加熱架，咁有誠意，難怪可以打入十強啦。
第8位 肉骨皇
圖：又一間位於大坑嘅餐廳，主力供應肉骨茶同埋星馬菜式，去到當然要試肉骨茶啦，仲有埋小火爐提供，凍咗都可以加返熱。呢度嘅肉骨茶仲加咗羅漢果製作，藥膳味突出外亦帶有陣陣清甜。另外亦推介味道香濃嘅海鮮喇沙，食材仲好豐富，蜆、青口、魚片頭同蝦等都有。
第7位 雞吧（*新上榜）
圖：好多人都鍾意食炸雞，呢間外賣小店主打嘅韓式炸雞有多款口味，包括黃金芝士、蜂蜜牛油、雪山芝士、黑松露蛋黃醬等，可以揀一半一半，一次食到2隻味。芝士控就一定要揀黃金芝士，勁多芝士粉，啖啖芝香好滿足。炸雞外脆內軟，有埋肉汁添。
第6位 Heart Coffee（*新上榜）
圖：每個月都總會有啲CAFÉ上榜，今個月都唔例外。位於佐敦嘅全白CAFÉ，有多款生酮飲食選擇。cheesecake口味仲好特別，推介杏仁豆腐芝士蛋糕，杏仁味好香，豆腐味仲好濃郁，兩者平衡得宜。而芫荽控應該會幾鍾意芫荽金不換帶子長通粉，幾有驚喜。
第5位 ASOK Thai Garden（*新上榜）
圖：本店喺元朗嘅阿叔泰麵，開到尖沙咀嘅分店一樣大受歡迎。呢間店以泰式Fusion菜為主，行另一種風格，藤椅、太陽傘都有，幾有度假feel，門口仲有榻榻米位啱晒打卡。無論係烤雞飯定青咖喱牛肉等都喺水準之上，但食咩都好，記得要留肚最尾食埋芒果糯米飯，個presentation好鬼靚，椰香十足，面頭仲有埋焦糖脆脆添，層次豐富。
第4位 Kroffle（*新上榜）
圖：新開冇耐嘅外賣小店，憑住牛角窩夫極速打入十強榜。佢哋有5款醬料配搭選擇，例如花生醬、榛子等，口感酥脆。想要飽肚啲嘅可以揀有埋餡料嘅牛角窩夫堡，龍蝦肉牛油果堡感覺清新，配埋炒蛋、生菜等，十足十一份all day breakfast咁。
第3位 Neko Puff
圖：繼續留守榜內嘅屯門拿破崙蛋糕店，唔止得到街坊支持，更有唔少朋友慕名去幫襯。無他嘅，以法國直送原材料認真製作，拿破崙鬆脆香口，款款口味都好吸引。今次推介下芒果拿破崙，有粒粒芒果肉，三層酥皮都又薄又脆，就算中間啲cream都唔會話過甜，仲好滑添。想要多少少嚼口嘅，則可揀朱古力香蕉麻糬味。
第2位 陳儀興飯店
圖：相隔一個月再次上榜嘅潮州打冷店，鹵水拼盤絕對係必嗌，生腸紅腸大腸等咩都有啲，滷水膽汁自家秘製，都幾入味。香口嘢嘅代表有撚手蒜香骨，外層香脆，而食落去仲有肉汁，最緊要係肉質依然保持鬆軟。
第1位 新沙洞澡堂（*新上榜）
圖：走韓風嘅呢間CAFÉ，以韓國澡堂為設計藍本，裝修非常特別，淨係個迷你浴池都夠晒打卡。餐廳有多款韓式Fusion料理供應，熔岩芝士流心炸豬扒飯就夠晒效果，炸豬扒大大塊，中間嘅芝士爆漿兼拉絲。如果同閨蜜嚟嘅話，下晝可以悠悠閒咁嘆返個high tea set都唔錯，馬卡龍、士多啤梨吉士撻、奶醬窩夫等有勁多款甜品呢。
