大家對印尼甜品嘅認識有幾多呢？其實香港多個美食旺區都有地道印尼餐廳、小店供應當地正宗嘅特色甜點，好似呢幾間甜品店都有大眾化選擇啊～
人氣糕點舖 印尼美食館
近期成為網民熱話嘅印尼餐廳，地面主要售賣地道糕點，而地庫則為餐廳堂食區。人氣糕點多達20款鹹甜口味，其中招牌千層糕系列幾乎每日3pm前沽清，好受歡迎㗎！煙韌控必試人氣千層糕，三款口味包括斑蘭椰汁朱古力、經典椰汁同米粉味，12層相間分明，口感Q彈，重點係只賣$7/件咋～開飯仔就推介斑蘭黃金糕同香葉糯米雞，前者彈牙富獨特斑蘭香氣；後者外層軟糯，中間雞絲好足料，食過返尋味。
巨大經典印尼刨冰+糖水 Restoran Indonesia Kampung Kita
每逢假期，呢間餐廳經常排長龍，開飯仔喺平日非繁忙時間到店，亦近乎坐滿當地人，可見受歡迎程度甚高。餐牌上單係甜品特飲已經超過40款，經典印尼甜品「斑蘭葉上海刨冰Es Shanghai」顏色繽紛，以椰子斑蘭糖漿刨冰作基底，搭配多款煙韌配料同水果，好似紅珍珠、綠色粉條（煎蕊）、糖棕櫚果等等，食落有種獨特甜味，好過癮㗎～另有仙草椰汁冰，佈滿厚身椰肉同仙草粒，巨人分量啱晒同朋友share食。
斑蘭×椰子主題糕點 Kampoeng
透明鹹甜點櫥窗、一籮籮香料調味粉、懸掛半空大包細包嘅零食，好似乾貨零食補給店，但行入去係餐廳嚟㗎。鹹甜點櫥窗有各種以斑蘭同椰子做主角嘅糕品，除咗千層糕，仲有坊間少見嘅椰奶糯米糍、椰糖蛋糕同斑蘭椰子糕。其中椰奶糯米糍賣相似小雪山，頂端有鹹香椰奶，以椰絲做餡料，鹹甜交織又幾夾。
米芝蓮推介 好運印尼餐廳
原圖：由印尼華僑開設兼經營超過30年，喺觀塘區內人氣頗高，更連續獲得11年米芝蓮推介𠻹。餐館裝潢散發印尼風情，有為人熟悉嘅珍多冰、三色冰、龍眼冰等甜品特飲，亦有特別款式，如椰汁黑糯米、榴槤亞答子冰同青瓜冰，想試少見或經典口味都滿足到你～
文：Sharon
編：Cathy
相、片：Tom
