講到去掃街必食嘅，章魚小丸子一定係其中一個人氣items！今期介紹嘅間間都各有擁躉，睇吓邊間啱你口味？
堅持選用原隻章魚 真‧章魚無雙 
圖： KaWaiL
於葵廣起家嘅人氣章魚燒專門店，受歡迎程度喺短短幾年已經開咗6間分店，包括另一超旺掃街場太安樓。佢哋堅持以原隻章魚製成章魚小丸子，每一粒入面都有2-3粒章魚仔，大大粒好飽滿。最受歡迎嘅口味包括真黑松露，黑松露醬汁淋滿成份章魚燒，上面仲有黑松露作點綴，好香濃同埋creamy。另外都幾推介蟹膏口味，蟹膏嘅鮮味配埋醬汁原來好夾～
超多口味選擇 八章軍
圖：於紅磡同荃灣都有分店，所有都係即叫即燒保證熱辣辣～呢間嘅賣點有超過15款口味選擇，人氣No.1口味係蜜糖芥末，夾雜住微微嘅甜同辣，層次感好豐富，仲加咗粟米增加口感。而章魚燒真係燒到全個外層卜卜脆，入面就夠軟心，一咬落去有爆餡嘅感覺。另外其他口味都好特別，如清新啲嘅柚子味、沙律蛋味、櫻花蝦味、紫菜肉鬆味同牛油粟米味等。
四拼口味超貼心 章魚燒大師
圖：屯門區內人氣小店，喺荃灣都有分店，8粒章魚小丸子都只係$34，性價比幾高～每粒嘅章魚都好大粒，食落外層微脆，內餡口感偏軟，餡料有埋蔥花同紅薑好豐富。最正係佢有供應4拼口味，包括明太子、Wasabi、飛魚子同原味，鍾意刺激同清爽感大推Wasabi，飛魚子都超足料，啱晒叫一盒同朋友分享呀。
元朗人氣小店 麴町
圖：元朗好受歡迎嘅章魚燒專門店，每粒小丸子都放入大大隻八爪魚，粉漿同所有醬汁都係自己調配；小丸子外脆內軟，唔會一食落去成口粉，好有誠意。黑松露小丸子醬汁用黑松露同黑松露油製成，分量一啲都無手軟，啖啖都係黑松露香氣。芝士控就梗係試呢個芝士口味啦～加上芝士絲、原塊芝士然後再用火槍炙燒，食落去特別香口，仲有拉絲效果𠻹。
文：Yanica
編：Cathy
