又嚟到每月報榜嘅時間！4月份嘅十強名單，整體嚟講都係以裝修有格調嘅café為主，睇嚟食飯同打卡已經成為香港人密不可割嘅日常。
第10位 Lady Nara（*新上榜）
圖：以夢幻粉紅色做餐廳主題，喺起跑線上已經先贏到一眾女生歡心，再加多張打卡專用嘅藤造鞦韆，就更易得到人氣。食物質素都有一定水準，龍蝦冬蔭意粉同香茅燒雞係香港限定嘅菜式，前者啖啖龍蝦鮮香；後者用咗18款香料醃製，一聽就知夠晒香濃。
第9位 九份飽（*新上榜） 
圖：掛住台灣美食嘅朋友，嚟到呢度應該可以滿足到。香酥雞扒魯肉飯只係40幾蚊，大大塊雞扒炸得香脆，同時仲好juicy。魯肉飯醬汁香濃惹味。食完唔使走下場，呢度有埋甜品直落，仲係大家嘅飛佛煙韌芋圓，一碗有齊仙草、芋圓、珍珠、地瓜圓等，相當足料。
第8位 濟洲燒肉食堂（*新上榜） 
圖：望住個海食韓燒會唔會太chill？有多款牛肉選擇，豪快和牛燒油花較多，入口即化；特選黑毛和牛上貝身肉嘅肉味濃郁，啖啖肉汁，各有口感。爐邊蛋同芝士仲可以任食添。Lunch時亦有提供熟食套餐。
第7位 福岡漢堡扒
圖：呢間嚟自韓國嘅石燒和牛漢堡扒餐廳再次上榜，足證佢嘅受歡迎程度。大部分客人當然係為咗佢哋嘅100%澳洲和牛漢堡啦，芝士蛋和牛漢堡、芝士蛋蒜和牛漢堡、墨西哥辣椒和牛漢堡、菠蘿煙肉和牛漢堡等，幾款口味全部自己燒自己食，脆脆地又有肉汁，過足癮。
第6位 哈豆（*新上榜）
圖：又一間台灣料理上榜，呢間係由台灣人開架，供應各式各樣嘅台灣美食，無論係牛肉麵、滷肉飯、鹹酥雞定係吐司等都有。好多人嚟到都會嗌份芋見檸奶凍吐司，爆焰架，芋泥綿密香滑，仲有清新檸檬碎中和返，唔使怕膩。另外推介台式麻油雞湯，湯頭清甜，雞肉嫩滑。
第5位 No Money So Lonely（*新上榜）
圖：以懷舊玩味風格裝修作招徠嘅呢間餐廳，原來係人氣café Mamaday嘅姊妹店，唔怪得個feel咁似。餐廳同樣得到大眾喜愛。推介啖啖蟹肉擔擔飯，冇改錯名，真心啖啖蟹肉，仲有蟹籽添，帶微微辣香。芫荽黨員就必點牛油果芒果芫荽沙冰啦，濃濃嘅荽味過後就會有芒果甜架喇。
第4位 齋啡（*新上榜）
圖：以白色為主調café，總係有種難以抗拒嘅吸引力，可能係容易畀人一種舒服relax又好打卡嘅感覺啦。呢間café都唔例外，佢哋供應多款自家製作嘅輕食，同埋無蛋奶嘅純素食品。最受歡迎嘅甜品係純素榴槤蛋糕，加入新鮮果肉製作架，真材實料！而latte則選用燕麥奶沖製，想要香甜口味嘅可試焦糖竹炭latte。
第3位 牧羊少年咖啡館
圖：多得港島區朋友嘅愛戴，將呢間café再次推入十強榜。推介日式大阪燒風味煙三文魚薄餅，大阪燒醬汁酸酸甜甜，煙三文魚又有淡淡煙燻香，連埋木魚碎同紫菜絲，就好似食緊脆口嘅大阪燒咁。香煎黑椒蒜蓉日本帆立貝鮮味十足，仲滲有陣陣牛油同蒜蓉香。
第2位 十二鍋（*新上榜）
圖：想打邊爐又想安全衛生啲，一人一鍋就啱晒。呢間火鍋店仲有12款湯底選擇，深得火鍋之友歡心。食得辣嘅就唔使諗啦，一定揀台式麻辣鍋，用豆瓣醬、花椒、辣椒、洋葱等炒香過嘅湯底麻香刺激，配埋鴨血、牛肉、台式蛋餃等真係冇得輸。想要養顏嘅就有美肌牛乳鍋，花膠、鮮淮山、蟲草花等，夠晒滋潤。而多款食材、配料都係由台灣直送。
第1位 何蘭正（*新上榜）
圖：一向深受beergeeks歡迎嘅呢間餐廳，最近搬咗新舖位，轉咗做樓上舖，裝修更懷舊，既有舊式通花鐵閘又有霓虹燈，比起舊店更多打卡位置。酒水食物方面繼續保持水準，招牌菜順德風情雙籽三文魚他她配香脆雲吞皮不能不試，口感豐富；24小時慢烤伊比亞叉燒配豬油飯亦係推介，係肥仔架喇，但慢煮豬肉肉質軟腍而又有燶邊效果，撈埋豬油梗係香口，食咗先算啦。
文：Kar
