4月中期嘅時間，防疫措施終於放寬，晚巿又可以重開返，飲食業界可以話終於再次見到曙光。大家餓咗咁耐，到底一可以出返嚟食，咩餐廳會係最受歡迎呢？
第10位 就是偏偏喜歡你 （*新上榜）
近期IG 嘅大熱店，由花藝師主理嘅花花主題餐廳，由環境到食物擺盤都係打卡位，熔岩石山有朱古力同抹茶兩款口味，嗜甜嘅揀朱古力，唔止面層有大量可可粉，就連中間都有朱古力醬同埋朱古力粒，一切開啲醬就湧出嚟，好澎湃。cute cute嘅特飲仲會有隻熊仔喺上面，好有童心。
第9位 喫茶ちょうぼ （*新上榜）
位於大埔嘅和洋料理，裝修行vintage風。好多朋友嚟到都會叫蛋包飯，賣相吸引，輕輕一切，半熟蛋漿就會完美咁「打開」蓋住啲飯，校準時間影boomerang啊。蛋包飯可配壽喜燒風牛肉或日式燉紅酒牛肉等。甜品推介伯爵茶戚風蛋糕，口感鬆軟，淡淡茶香，最緊要唔膩啊。
第8位 不籽是咖啡 （*新上榜） 
西營盤開多咗好多café，其中呢間空間感十足，木系簡約嘅裝修風格吸引咗唔少文青去打卡影相。餐廳以西日菜式為主，其中比較特別嘅有北海道干貝火龍果燉飯，成碟飯都係紫紅色好搶眼；另一主打推介係龍蝦湯配牛油果大蝦稻庭烏冬，有茶壺慢慢倒入熱龍蝦湯，香濃鮮甜，鳥冬又掛湯，味道唔錯。
第7位 Ikigai Concepts
每個月嘅十強，總唔少得日本餐廳。今次呢間再度上榜，實力不容置疑。成萬二平方呎大嘅餐廳，分咗唔同區域，又有Omakase、又有鐵板同日式料理食。日式西西里紅蝦意粉有大大隻紅蝦，爽口彈牙，鮮味滲埋入意粉度。另外，炭燒美國肉眼又係大大塊，外脆肉嫩仲好juicy添。
第6位 鐵花村 （*新上榜）
主打台東美食嘅台式小店，老闆都係台灣人，加上滿天燈籠等裝飾，的確畀人有種去咗台灣嘅錯覺。推介各款蛋餅，包括松露芝士、粟米芝士、肉鬆等，全部都足料爆餡。麵線最好就係揀綜合麵線，唔使揀，一碗有齊蚵仔同大腸等熱門配料，香口惹味，係台灣嘅味道啊。
第5位 ASOK Thai Garden
呢間泰式café，又係近期嘅大熱餐廳，setting chill到好似去咗泰國啲沙灘渡假咁。食物款式亦比其他分店多元化，推介可試泰式羊膝配烤餅，羊膝慢煮處理，唔會好羶，香料味濃郁。另外幾乎枱枱都會有個樽仔喺度——泰式奶茶——樽身好靚，重點係泰奶特別調製過，冇平時飲開嗰啲咁甜，綠色嗰款仲會加埋lemongrass落去，好香。
第4位 合十 （*新上榜）
打卡café繼續稱霸十強榜，呢間係波希米亞風，有室內同室外嘅位置，室外嗰啲真係成個帳幕咁搭喺度，好有feel！巨型豬扒一樣咁有feel，堅巨型架，分分鐘大過你塊面。不過咁大塊都好啦，肉質依然都係軟腍嘅，調味唔多，可以食返原汁原味。咖啡方面都幾有新意，好似法式焦糖燉蛋咖啡咁，飲落真係有陣焦香同甜香。
第3位 HIKARI
再度上榜嘅荃灣兩層高café，簡約白色主調帶出悠閒嘅感覺，過嚟食返餐西式輕食，心情都放鬆啲。賣相唔錯嘅海鮮牛油果他他，幾層配搭和諧，作為前菜幾醒胃。慢煮美國安格斯牛板腱新奥爾良飯都幾有特色，有啲似risotto嘅感覺，而牛板腱厚得嚟都幾軟嫩。
第2位 南越南咖啡廳
以南越菜作招徠嘅餐廳，喺香港又的確唔多見。多款具南越街頭特色嘅美食，當然帶畀港人新鮮感。菜式融入各處嘅食材同創意，例如雞軟骨就進化成Shake Shake雞軟骨，連埋辣味調味粉一齊放入袋度shake，脆卜卜又粒粒沾滿辣粉，夠刺激。烤蔞葉雞配青蘋果條都係少有嘅配搭，雞皮香脆，配青蘋果條又多咗份清新。
第1位 Boy n Burger
漢堡一直都係大家comfort food，呢間漢堡店仲要又平又抵食，開得喺灣仔都係$28就買到個包。而且佢哋耐唔耐就會有期間限定嘅新嘗試，4月就係佐世保漢堡喇，有黃金豆腐同黃金炸魚漢堡，就算成日幫襯都唔會悶。當然，煙肉雙層芝士漢堡係長期皇牌，香脆惹味，牛肉又juicy，性價比高。
文：Kar
