平時食燒肉唔少人都鍾意揀和牛，如果想轉換吓口味，其實韓牛都一樣咁高質素！其濃厚牛味加上較為平衡嘅肉質油脂分佈，口感更有嚼勁。今期搵咗幾間有供應韓牛嘅燒肉店畀大家，牛魔王一定要 Mark 低～
 

目錄

新鮮韓牛直送到香港  GALBI TOWN 

同韓國嘅供應商合作，將新鮮嘅韓牛直送到香港，期望由運輸、食材處理、烹調手法等每一個環節都達到香港最高品質嘅韓牛烤肉店標準～餐廳所有韓牛均選用最高級別嘅1++等級，每份都有「出世紙」㗎。必食招牌「櫻花蜂蜜」特選牛肋骨，用韓國櫻花蜂蜜醃製，每一淡都感受到淡淡清甜，一啲都唔膩。韓牛綜合套餐就有齊三款1++頂級韓牛熱賣部位，包括肉眼扒、牛里脊、牛頸肉及牛胸肉，啱晒咩部位都想試吓嘅朋友！

列車送餐主題烤肉店  Bingle Bingle

主打空中列車主題嘅烤肉店，餐廳環境走 Cyber 風格，將橙色同金屬色調融合，裝潢加入宇宙科幻元素，充滿未來感！主要供應韓式烤肉及日本和牛，1++ 韓牛日韓極上套餐包括韓牛前腿肉、宫崎 A5 和牛肉眼蓋、宫崎 A4 和牛三角腩、韓式牛肉雜菜湯及韓式涼菜，韓牛前腿肉牛味超香濃，用黑胡椒及玫瑰岩鹽調味烤製味道更昇華～

高級韓式居酒屋  교자상 

圖: tonguetravel

有時想食高級啲嘅韓國菜，可以試吓呢間韓式居酒屋呀。雖然唔係韓燒餐廳，但佢有供應專人即場席前燒 1++ 韓牛前胸肉，會拎埋個爐頭同大鑊出嚟喺客人面前燒香，加埋泡菜、芽菜、水芹菜、靈芝菇、辣韮菜等配料食，韓牛前胸肉好似肥牛咁薄但一啲都唔肥膩，仲好重牛味、口感軟滑。另有鹽底麻油比大家點，層次再豐富啲。

韓式濕式熟成烤肉  馬場洞烤肉專門店

圖: mylittlegourmand

採用濕式熟成肉類處理方法嘅韓燒餐廳，必試 1++ 韓牛套餐，特意由韓國忠清南道引入於當地飼養、獲當地政府判定為 1++ 級別嘅正統韓牛，脂肪分布細密如大理石紋，油脂香濃但唔肥膩。呢個套餐包括韓牛肉眼、韓牛肋排、韓牛霜降牛，全部都係 1++ 等級，仲有牛板腱、韓式生拌牛肉或招牌炸雞！

文: Yanica