冬甩一入口香甜鬆軟，餡料又軟滑，難怪咁多人都係fans！近年香港都開設咗唔少冬甩專門店，如人氣爆餡冬甩，口味方面都愈來愈多選擇，甜品控有福啦～
開心果+斑蘭椰子口味 Cookie Vission
大坑一間人氣軟心曲奇專門店，最近開始賣埋冬甩，質素一樣咁出色呀！口味方面會有8-10款選擇，每日都會有少少唔同，而且都好有特色呀。如斑蘭椰子坊間真係好少見，未食已經聞到好香嘅椰子味，入口感受到面層嘅斑蘭醬料，味道比想像中唔甜。開心果味都係人氣之選，面層灑滿開心果碎，一切開就係爆餡嘅開心果醬，愈食果仁香愈突出，醬料亦加入咗焦糖果仁脆脆令層次更豐富。
圖: 全新湖水綠冬甩店 Nuts Donut Shop
中環最近新開、以湖水綠作主題嘅冬甩專門店，連外賣盒都係湖水綠色，好啱影相！店舖由網店起家，口味方面雖然都只係基本口味，如Classic、Cinnamon Sugar及Chocolate Ganache等，但冬甩本身已經好出色，質感軟熟口彈力高，而且唔太甜又唔油膩。其中最多人食就係Cinnamon Sugar味，肉桂味香濃，另外仲有mini版本，一啖一粒好方便！Blueberry Basil Bourbon Doughnut都好有特色，冬甩用藍莓配上羅勒及威士忌製成，充滿果香～
圖: tiffsuet
人氣即叫即炸冬甩 Dough Bros Pizza & Doughnuts 
主打酸種pizza及冬甩，特別係Filled Doughnuts，新鮮熱辣即叫即炸，每一個拎上手都熱辣辣㗎！最受歡迎係榛子醬及吉士口味，前者一咬就係滿滿嘅Nutella醬，加埋鬆軟嘅麵包，OMG好邪惡，味道稍為偏甜，兩個人share食就啱啱好。另外仲有士多啤梨果醬、檸檬及咖啡等清新啲嘅口味揀添！
圖: 打卡必去咖啡店 Pane e Latte
赤柱大街呢間人氣打卡café，經常都大排長龍，餐廳主打麵包、冬甩、蛋糕等烘焙品，啱晒女生們去飲茶傾偈呀。呢度嘅冬甩同樣都係爆餡嘅BOMBOLINI種類，有開心果覆盆子、檸檬、朱古力及雲呢拿等口味，用軟酵母麵團製成，好鬆軟又唔太甜。呢個招牌Croissant Bomboloni都不得了，外層香脆裡面軟熟，內餡係帶橙香嘅吉士，味道比想像中清香。
圖: kinki17
印尼冬甩專門店 J.Co Donuts & Coffee
來自印尼嘅冬甩專門店，所有冬甩都每日即製，新鮮炸起後加上糖霜及Toppings，味道方面接近30款，而且價錢都好實惠，好吸引呀～如皇牌白朱古力果仁，濃厚朱古力配上香脆果仁，層次好豐富。另外仲有薑餅朱古力金寶、士多啤梨彩虹及黑朱古力脆米等口味，各有特色！
圖: Ritakitty
文: Yanica
