5大港式豉油西餐推介屹立半世紀老店、人氣親民扒餐

有時食飯除咗食味道仲可以食埋情懷，講到令香港人回味嘅嘢，又點少得平民又好食嘅港式鐵板豉油西餐呢？豉油西餐係具有香港特色嘅西餐，殖民地時代因為唔係個個都負擔得起正宗西餐，所以就演變出呢種平民料理，主要有餐湯配餐包、主菜及飲品等。到而家豉油西餐已經係香港其中一樣特色本地美食，今期介紹5間畀大家，有屹立半世紀嘅老字號，亦有啲抵食之選，一齊重拾舊時回憶喇！

60年歷史老字號波士頓餐廳

圖：clming2001

已經於香港屹立半世紀嘅老字號扒房，成個用餐氛圍都好有懷舊氣息。相信唔少人食豉油西餐嘅回憶都係火焰show，呢度一樣有得睇有得食～招牌火焰牛柳，侍應會喺遠處將牛柳浸過火砵酒就放上鐵板，最後將砵酒倒喺鐵板上，火勢都幾猛烈㗎！唔單止好睇，味道都唔錯，牛柳五成熟啱啱好，肉質好軟糯仲帶有絲絲酒香～

佐敦人氣餐廳酒吧牛屋餐廳酒吧

圖：h0410232

呢間港式西餐最出名就係威靈頓牛柳，酥皮較一般嘅薄同好酥脆，牛柳口感相當嫩滑，牛味都好突出，雖然配嘅唔係鵝肝醬而係野菌醬，但係喺平民扒房食到呢個質素已經好難得。餐包都可以見到店家心思，先切開煎香底部再塗上牛油，口感鬆軟又香脆。另外lunch set都好抵食，紐西蘭肉眼餐$98就連埋餐包同餐湯，難怪咁受歡迎啦！

人氣親民價扒餐金鳳大餐廳

圖：YungYung YungYung

好受上班族歡迎嘅港式平民扒房，除咗價錢抵食仲已經開到好多區都有分店啦～呢度有各式各樣唔同嘅扒餐可供選擇，美式同港式都有，最招牌嘅扒餐就有野菌牛柳餐同香燒羊扒餐等，野菌汁菌香好突出又唔會搶走牛味，比起黑椒汁同蒜蓉汁無咁heavy。如果係餐廳嘅忠實粉絲，一定會識得嗌加蒜蓉，味道會更香濃呀～雜錦炸物小食拼盤包括黑椒蜜糖雞翼、日式吉列炸蝦、吉列手指魚及脆脆薯格，啱晒同朋友分享。