睇返5月嘅十強名單，有一半都係第一次上榜，有素食嘅，都有燒肉店；有放題，又有磯燒；有日式，又有台式同泰式，百花齊放。
第10位 素一 （*新上榜）
圖：新開嘅素食自助餐，迅速打入十強嘅位置，可見素食文化已經逐漸普及。而呢間餐廳，除咗一般傳統嘅中式素食之外，就連日式素食都有。即係有素壽司、素魚生咁。「三文魚」係蒟蒻，「三文魚子」則係海藻珠，味道都幾似。
第9位 爆汗串串（*新上榜）
圖：麻辣呢家嘢本身已經好受辣椒仔女歡迎，呢間仲要做麻辣串串放題，有成40幾款選擇，能夠上榜一啲都唔意外。麻辣湯底以香料同秘製辣椒油，加埋豬骨、雞骨咁熬製5小時，唔辣就奇，仲要夠麻嗰下先至過癮。必食梗係各種索湯力強嘅娃娃菜呀煙肉金菇呀仲有牛肉都好鬼惹味，最後仲可以食冰粉解返辣。
第8位 焱丸水產（*新上榜） 
圖：日本嘢幾時都係香港人飛佛，呢間日式磯燒海鮮餐廳提供多款日本直送嘅生蠔、鮑魚等食材，裝修仲整到成個傳統日式魚巿場咁。大大隻貴妃蚌燒完都仲係好鮮甜好多汁，特別推介梅酒煮海老，好少食到呢款pairing啊。用梅酒煮熟嘅蝦，喺原有嘅海水味中滲出淡淡微甜嘅酒香，酒鬼要試啦。
第7位 桂花小幸（*新上榜）
圖：好多人成日覺得將軍澳一嚟遠，二嚟冇乜嘢好食，今次呢間台灣菜餐廳就話畀大家聽，將軍澳都有嘢食㗎！除咗一般牛肉麵外，大家不妨可一試下啲湯飯，其中士林胡椒豬肚湯飯同蟲草花子豬肚雞湯飯都好有誠意，前者辣辣地好送得飯，後者有陣陣蟲草花香，相當足料。
第6位 ULURU
圖：上個月第二位嘅ULURU 今個月繼續留榜，黑白色既簡約又型格嘅裝修主調，係一眾愛打卡朋友仔嘅寵兒。而食物嘅色調亦係亮點，好似紅黑紅紅黑嘅紅菜頭野菌竹炭漢堡、成朵玫瑰喺杯內嘅Rose Tea等，呃like零難度。
第5位 船皇（*新上榜）
圖：近年興起多間泰國船麵餐廳，呢間突圍而出打入十大嘅，最大賣點當然係平啦！最平$12就食到一碗喎！而且仲打破「平嘢冇好嘢」嘅定律，老闆親自去過泰國學師㗎，手法正宗，秘製湯底藥材味濃，鮮甜微辣，牛腩同湯麵盡精華，啖啖滋味。
第4位 南瀛水產
圖：繼上年年底後再度上榜嘅日本餐廳，大部分食材都係由日本直送，壽司、刺身、磯燒、鍋物同天婦羅等都有得食。特別推介兩款自創卷物：雲丹蟹肉卷、南瀛卷。前者又海膽又蟹肉簡直係大滿足，後者就仲豐富，海膽、魚子、拖羅蓉再加多隻牡丹蝦，點忍？
圖：呢間主打正宗英式三層架下午茶嘅餐廳，穩守第3名。純白裝修、水晶吊燈，淑女裝飾，單係格局已經贏得一眾女士歡心。自家製手工蛋糕仲要主張無添加，全天然成分製，就更加冇得輸。首推招牌伯爵茶戚風蛋糕，茶味濃香，口感輕盈，又的確係幾啱5月份同媽媽嚟食返餐嘅~
第2位 牛魔（*新上榜）
圖：一眾牛魔王成功令呢間牛肉燒肉店打入第2名嘅位置，餐廳主打美國、日本、澳洲嘅和牛，由客人自己燒製，自由控制生熟度。多款部位選擇可能令大家花多眼亂，推介可試A4無敵霜降和牛小排，前者脂肪平均，入口即溶，都係揀唔到嘅就叫終極拼盤啦，一次過試晒5個部位。每枱仲有自助啤酒機可以自己斟酒，爽呀。
第1位 粒粒果甜品
圖：呢間旺角甜品店，第3次上榜終於成功一嚐榜首位置啦~ 佢哋嘅透明水果星球又真係好鬼靚，好鬼啱打卡嘅。粒粒都晶瑩剔透，內藏果肉又有果汁，睇得又食得，抵佢哋拎第1嘅。
文：Kar
